கிருஷ்ணகிரியில் கடந்த 2005 ஆம் ஆண்டு வெளியிட்ட செய்தி ஒன்றிற்காக தினமலர் ஆசிரியர் மற்றும் வெளியீட்டாளருக்கு கிருஷ்ணகிரி நீதிமன்றம் 2 ஆண்டுகள் சிறை தண்டனை வழங்கியுள்ளது. அப்போது கிருஷ்ணகிரியில் இன்ஸ்பெக்டராக பணிபுரிந்து வந்தார் முத்தமிழ் முதல்வன். அந்த காலத்தில் தினமலர் நாளிதழில் வரும் டீக்கடை பெஞ்ச் பகுதியில் ’முத்தமிழ் முதல்வன் சட்டவிரோதமாக கர்நாடகாவில் இருந்து தமிழகத்திற்கு மதுபானங்கள் கடத்துவதைக் கண்டுகொள்ளாமல் லஞ்சம் பெற்றார் எனவும், அதற்காகப் பெற்ற லஞ்சத்தில் சொத்து வாங்கியதாகவும் செய்தி வெளியிட்டது.
இந்த செய்திக்கு எதிர்ப்பு தெரிவித்து முத்தமிழ் முதல்வன் கிருஷ்ணகிரி மாவட்டத்தில் வழக்குத் தொடர்ந்தார். 14 ஆண்டுகளாக நடந்த இந்த வழக்கில் கிருஷ்ணகிரி நீதிமன்றம் நேற்று தீர்ப்பு வெளியானது. தீர்ப்பில் ‘இந்த செய்தி ஆதாரங்களோடு வெளியிடப்படவில்லை. ஆனால் யூகங்களின் அடிப்படையில் வெளியான செய்தியில் ஏன் அதிகாரியின் பெயரைக் குறிப்பிடவேண்டும் ‘எனக் கேட்டு தினமலர் வெளியீட்டாளர் லட்சுமிபதி, ஆசிரியர் கிருஷ்ணமூர்த்தி ஆகிய 2 பேருக்கும் தலா 2 ஆண்டு சிறை தண்டனை விதித்துள்ளது.
மேலும் இருவருக்கும் தலா 5 லட்சம் ரூபாய் அபராதம் விதித்துள்ளது. அபராதத்தை செலுத்த தவறினால் மேலும் 3 மாதம் சிறை தண்டனை வழங்கப்படும் என தீர்ப்பளித்துள்ளது.
