பெண்கள் உலகக் கிண்ண கிரிக்கெட் போட்டியில் மேற்கிந்திய தீவை 7 விக்கெட் வித்தியாசத்தில் அவுஸ்திரேலியா அணி வீழ்த்தியது.
12ஆவது பெண்கள் உலகக் கிண்ண கிரிக்கெட் போட்டி (50 ஓவர்) நியூசிலாந்தில் நடந்து வருகிறது. 8 அணிகள் பங்கேற்றுள்ள இப்போட்டி தொடரில் இந்திய நேரப்படி நேற்று அதிகாலை நடந்த 14-வது லீக் ஆட்டத்தில் அவுஸ்திரேலியா- மேற்கிந்திய தீவு அணிகள் மோதின.
நாணயச்சுழற்சியில் வென்ற மேற்கிந்திய தீவு அணி துடுப்பாட்டத்தை தேர்வு செய்தது. அந்த அணி அவுஸ்திரேலியாவின் அபார பந்துவீச்சில் திணறியது. மேற்கிந்திய தீவு அணி 45.5 ஓவரில் 131 ஓட்டங்களுக்கு சுருண்டது.
அதிகபட்சமாச அணியின் தலைவி டெய்லர் 50 ஓட்டங்கள் எடுத்தார். கேம்பெல்லே 20 ஓட்டங்களும், டாட்டின் 16 ஓட்டங்களும் எடுத்தனர். மற்ற வீராங்கனைகள் சொற்ப ஓட்டங்களில் ஆட்டம் இழந்தனர். அவுஸ்திரேலியா தரப்பில் எலீசே பெர்ரி, கார்ட்னர் தலா 3 விக்கெட்டும், ஜோனாசென் 2 விக்கெட்டும் கைப்பற்றினர்.
பின்னர் இலக்கை நோக்கி விளையாடிய அவுஸ்திரேலியா 7 ஓட்டங்களுக்கு 2 விக்கெட்டை இழந்தது.தொடக்க வீரர் ஹீலி 3 ஓட்டங்களிலும், தலைவி லானிங் ஓட்டம் எதுவும் எடுக்காமலும் ஆட்டமிழந்தனர். அடுத்து களம் வந்த பெர்ரி 10 ஓட்டங்களில் வெளியேறினார்.
அதன்பின் மற்றொரு தொடக்க வீராங்கனை ரேச்சல் ஹெய்ன்ஸ் – பேத் மூனி ஜோடி சிறப்பாக விளையாடி அணியை வெற்றிப்பாதைக்கு அழைத்து சென்றது. அவுஸ்திரேலியா அணி 30.2 ஓவரில் 3 விக்கெட் இழப்புக்கு 132 ஓட்டங்கள் எடுத்து 7 விக்கெட் வித்தியாசத்தில் வெற்றிபெற்றது. ஹெய்ன்ஸ் 83 ஓட்டங்களுடனும், மூனி 28 ஓட்டங்களுடனும் களத்தில் இருந்தனர்.
அவுஸ்திரேலிய அணி தொடர்ச்சியாக 4-வது வெற்றியை பெற்றது. இங்கிலாந்து, பாகிஸ்தான், நியூசிலாந்து ஆகிய அணிகளை வீழ்த்தி இருந்தது.
இதுவரை அந்த அணி தோல்வியை சந்திக்கவில்லை. புள்ளி பட்டியலில் அவுஸ்திரேலியா 8 புள்ளிகளுடன் முதல் இடத்தில் உள்ளது.
மேற்கிந்திய தீவு அணி 2-வது தோல்வியை சந்தித்தது. அந்த அணி இதுவரை 4 ஆட்டங்களில் விளையாடி 2 வெற்றி, 2 தோல்வி பெற்று 4 புள்ளிகளுடன் 5-வது இடத்தில் உள்ளது.
இன்று நடக்கும் ஆட்டத்தில் இந்தியா- இங்கிலாந்து அணிகள் மோதுகின்றன.
