இலங்கை 19 வயதின் கீழ் பிரிவு மூன்று பாடசாலை அணிகளுக்கு இடையிலான ஒருநாள் கிரிக்கெட் தொடரில் கடந்த சனிக்கிழமை (24) நடைபெற்ற போட்டியில் யாழ். மத்தியக் கல்லூரி அணி இலகு வெற்றியை பதிவுசெய்தது.
நுகேகொட லைசியம் சர்வதேச பாடசாலை அணிக்கு எதிரான இந்தப் போட்டியில், மதீஷ்வரன் சன்ஜயன் மற்றும் என். அஜயின் சிறந்த துடுப்பாட்டங்களின் உதவியுடன் யாழ். மத்தியக் கல்லூரி அணி 7 விக்கெட்டுகள் வித்தியாசத்தில் வெற்றிபெற்றது.
முதலில் துடுப்பெடுத்தாட பணிக்கப்பட்ட லைசியம் சர்வதேச பாடசாலை 50 ஓவர்கள் நிறைவில் 6 விக்கெட்டுகளை இழந்து 213 ஓட்டங்களை பெற்றது. அரித வினால் ஆட்டமிழக்காமல் 64 ஓட்டங்களை பெற்றுக்கொடுத்தார்.
பதிலுக்கு துடுப்பெடுத்தாடிய யாழ். மத்திய கல்லூரி அணியின் மத்தியவரிசை துடுப்பாட்ட வீரர்களான மதீஷ்வரன் சன்ஜயன் மற்றும் என். அஜய் ஆகியோர் சிறந்த ஆட்டங்களை வெளிப்படுத்த, அந்த அணியானது 36.5 ஓவர்கள் நிறைவில் 3 விக்கெட்டுகளை மாத்திரம் இழந்து வெற்றியிலக்கை அடைந்தது. சன்ஜயன் 89 ஓட்டங்களையும், என். அஜய் 39 ஓட்டங்களையும் ஆட்டமிழக்காமல் பெற்றுக்கொடுத்தனர்.
