பருத்தித்துறையில் வெடி கொளுத்திய இருவர் கைது!

யாழ்ப்பாணம், பருத்தித்துறை நீதிவான் நீதிமன்ற நடவடிக்கைகளுக்கு இடையூறு விளைவிக்கும் வகையில் வெடி கொளுத்திய இருவர் கைது செய்யப்பட்டனர்.

நேற்றுமுன்தினம் வெள்ளிக்கிழமை பருத்தித்துறை பகுதியில் உயிரிழந்தவரின் இறுதி ஊர்வலத்தின்போது , நீதிமன்றுக்கு அருகில் அதிக சத்தமான பெருமளவான வெடிகளைக் கொளுத்தியமையால், சத்தம் காரணமாக நீதிமன்ற நடவடிக்கைகள் சுமார் 30 நிமிடங்கள் ஒத்திவைக்கப்பட்டிருந்தன.

இதையடுத்து உடனடியாக விசாரணைகளை மேற்கொண்ட பருத்தித்துறை பொலிஸார் வெடிகளைக் கொளுத்தினார்கள் எனும் குற்றச்சாட்டில் இருவரைக் கைது செய்து விசாரணைகளை முன்னெடுத்து வாக்குமூலங்களைப் பதிவு செய்தனர்.

அவர்களுக்கு எதிராக 15ஆம் திகதி நீதிமன்றத்தில் வழக்குத் தாக்கல் செய்யப்படும் எனவும், அன்றைய தினம் மன்றில் முன்னிலையாக வேண்டும் எனவும் அறிவுறுத்தி இருவரையும் பொலிஸ் பிணையில் பொலிஸார் விடுவித்தனர்.