ரி-20 உலகக்கிண்ணத் தொடரின் முதலாவது அரையிறுதிப் போட்டியில், நியூஸிலாந்துக் கிரிக்கெட் அணி 5 விக்கெட்டுகளால் வெற்றிபெற்றுள்ளது.
இந்த வெற்றியின் மூலம் முதல்முறையாக நியூஸிலாந்து அணி, ரி-20 உலகக்கிண்ணத் தொடரின் இறுதிப் போட்டிக்கு முன்னேறியுள்ளது.
அத்துடன் கேன் வில்லியம்சன் தலைமையில் தொடர்ச்சியாக 50 ஓவர்கள் உலகக்கிண்ணம், ஐ.சி.சி. டெஸ்ட் சம்பியன்ஷிப் மற்றும் ரி-20 உலகக்கிண்ணம் என மூன்று தொடர்களில் இறுதிப் போட்டிக்கு முன்னேறியுள்ளது. இதில் இந்தியாவை வீழ்த்தி ஐ.சி.சி. டெஸ்ட் சம்பியன்ஷிப் பட்டத்தை முதல்முறையாக வென்றது.
அபுதாபியில் நேற்று (புதன்கிழமை) நடைபெற்ற இப்போட்டியில், நியூஸிலாந்துக் கிரிக்கெட் அணியும் இங்கிலாந்து அணியும் பலப்பரீட்சை நடத்தின.
இப்போட்டியில் நாணய சுழற்சியில் வெற்றிபெற்ற நியூஸிலாந்துக் கிரிக்கெட் அணி, முதலில் களத்தடுப்பை தீர்மானித்தது.
இதன்படி முதலில் துடுப்பெடுத்தாடிய இங்கிலாந்து அணி, நிர்ணயிக்கப்பட்ட 20 ஓவர்கள் நிறைவில், 4 விக்கெட்டுகள் இழப்புக்கு 166 ஓட்டங்களை பெற்றுக்கொண்டது.
இதில் அணியின் அதிகப்பட்ச ஓட்டங்களாக, மொயின் அலி தனது முதலாவது ரி-20 உலகக்கிண்ண தொடரின் அரைசதத்தை பதிவுசெய்தார். அவர் ஆட்டமிழக்காது 51 ஓட்டங்களை பெற்றுக்கொண்டார். மேலும், டாவிட் மாலன் 41 ஓட்டங்களை பெற்றுக்கொண்டார்.
நியூஸிலாந்துக் கிரிக்கெட் அணியின் பந்துவீச்சில், டிம் சவுத்தீ, ஆடம் மில்ன், இஷ் சோதி மற்றும் ஜிம்மி நீஷம் ஆகியோர் தலா 1 விக்கெட்டினை வீழ்த்தினர்.
இதனைத்தொடர்ந்து 167 என்ற வெற்றி இலக்கை நோக்கி பதிலுக்கு களமிறங்கிய நியூஸிலாந்துக் கிரிக்கெட் அணி, 19 ஓவர்கள் நிறைவில் 5 விக்கெட்டுகள் இழப்புக்கு 167 ஓட்டங்களை பெற்றுக்கொண்டது. இதனால் நியூஸிலாந்துக் கிரிக்கெட் அணி 5 விக்கெட்டுகளால் வெற்றிபெற்றது.
இதன்போது அணியின் அதிகப்பட்ச ஓட்டங்களாக, டேரில் மிட்செல் ஆட்டமிழக்காது 72 ஓட்டங்களையும் டேவோன் கோன்வே 46 ஓட்டங்களையும் பெற்றுக்கொண்டனர்.
இங்கிலாந்துக் கிரிக்கெட் அணியின் பந்துவீச்சில், கிறிஸ் வோக்ஸ் மற்றும் லியாம் லிவிங்ஸ்டன் ஆகியோர் தலா 2 விக்கெட்டுகளையும் அடில் ராஷித் 1 விக்கெட்டினையும் வீழ்த்தினர்.
இப்போட்டியின் ஆட்டநாயகனாக, 47 பந்துகளில் 4 சிக்ஸர்கள், 4 பவுண்ரிகள் அடங்களாக ஆட்டமிழக்காது 72 ஓட்டங்களை பெற்றுக்கொண்ட டேரில் மிட்செல் தெரிவுசெய்யப்பட்டார்.
