இயக்குநரும், நடிகருமான அமீர் இயக்கத்தில் தயாராகவிருக்கும் புதிய படத்திற்கு “இறைவன் மிகப் பெரியவன்” என பெயரிடப்பட்டு, அதன் டைட்டில் லுக் வெளியாகி இருக்கிறது.
ஜே எஸ் எம் பிக்சர்ஸ் என்ற பட நிறுவனத்தின் சார்பில் தயாரிப்பாளர் ஜாபர் தயாரிக்கும் திரைப்படம் “இறைவன் மிகப் பெரியவன்” தமிழ் திரை உலகில் முத்திரை பதித்த இயக்குநர் வெற்றிமாறன், புதுமுக திரைக்கதையாசிரியர் தங்கம் என்பவருடன் இணைந்து திரைக்கதை எழுதியிருக்கும் இந்தப் படத்தை, இயக்குநரும், நடிகருமான அமீர் இயக்குகிறார்.
ராம்ஜி ஒளிப்பதிவு செய்யும் இந்தப் படத்திற்கு யுவன் சங்கர் ராஜா இசையமைக்கிறார். இந்தப் படத்தில் நடிக்கும் நடிகர்கள் நடிகைகள் பற்றிய விவரங்கள் அதிகாரப்பூர்வமாக விரைவில் வெளியிடப்படும் என எதிர்பார்க்கப்படுகிறது.
“மௌனம் பேசியதே”, “ராம்”, “பருத்திவீரன்”, “ஆதிபகவன்” ஆகிய படங்களை இயக்கி சிறந்த இயக்குநர் என நிரூபித்திருக்கும் அமீர், சிறிய இடைவெளிக்குப் பிறகு இயக்கவிருக்கும் “இறைவன் மிகப்பெரியவன்” என்ற படத்திற்கு தொடக்கத்திலிருந்தே எதிர்பார்ப்பு உருவாகி இருக்கிறது.
இதனிடையே “இறைவன் மிகப் பெரியவன்” என்ற தலைப்பு, ஆன்மீக உணர்வுடன் இருப்பதாலும், டைட்டிலில் இஸ்லாமிய- இந்து -கிறித்தவ மதச் சின்னங்கள் பொறிக்கப்பட்டிருப்பதாலும் இணையவாசிகளின் கவனத்தை ஈர்த்திருக்கிறது என்பது குறிப்பிடத்தக்கது.
