பிரான்ஸ் விளையாட்டரங்கில் ஞாயிற்றுக்கிமை (04) நடைபெற்ற ஒலிம்பிக் 2024 விளையாட்டு விழாவில் ஓர் அம்சமான ஆண்களுக்கான 400 மீற்றர் அரை இறுதிப் போட்டியில் பங்குபற்ற அருண தர்ஷன தகுதிபெற்றார்.
இதன் மூலம் ஒலிம்பிக் வரலாற்றில் ஆண்களுக்கான 400 மீற்றர் ஓட்டப் போட்டியில் அரை இறுதிச் சுற்றுக்கு முன்னேறிய முதலாவது வீரர் என்ற சாதனையை அருண தர்ஷன படைத்தார்.
400 மீற்றர் தகுதிகாண் சுற்றின் 5ஆவது போட்டியில் பங்கேற்ற அருண தர்ஷன அப் போட்டியை 44.99 செக்கன்களில் ஓடி முடித்து 3ஆம் இடத்தைப் பெற்று அரை இறுதியில் பங்குபற்ற தகுதிபெற்றார்.
இது அவரது தனிப்பட்ட அதிசிறந்த நேரப் பெறுதியாகும்.
அப் போட்டியில் க்ரெனெடா வீரர் கிரானி ஜேம்ஸ் (44.78 செக்.) முதலாம் இடத்தையும் கனடா வீரர் கிறிஸ்டோபர் மொரேல்ஸ் வில்லியம்ஸ் (44.96 செக்.) இரண்டாம் இடத்தையும் பெற்றனர்.
அமெரிக்கர்களான மைக்கல் நோர்மன் (44.10 செக்.), குவின்சி ஹோல் (44.28 செக்.) ஆகிய இருவரும் தத்தமது தகுதிகாண் போட்டிகளில் முதலாம் இடங்களைப் பெற்றனர்.
தகுதிகாண் சுற்றில் 6 போட்டிகள் நடத்தப்பட்டதுடன் மொத்தம் 44 வீரர்கள் பங்குபற்றினர். அரை இறுதிக்கு தகுதிபெற்ற 18 வீரர்களில் இணை 14ஆவது இடத்தை அருண தர்ஷன பெற்றார்.
எவ்வாறாயினும் இரண்டாம் வாய்ப்பில் பங்குபற்றவுள்ள 3 வீரர்கள் அருண தர்ஷனவைவிட சிறந்த நேரப் பெறுதிகளைப் பதிவுசெய்துள்ளனர்.
