மழைக்காலம் தொடங்கியுள்ள நிலையில், பல பகுதிகளில் நுளம்புகளின் பெருக்கம் அதிகரிக்கக்கூடும். குறிப்பாக தேங்கி நிற்கும் நீரில் ஏடிஸ் வகை கொசுக்கள் இனப்பெருக்கம் செய்வதால், டெங்கு போன்ற நுளம்புகளால் பரவும் நோய்களின் அபாயமும் அதிகரிக்கிறது.
இதனால் வீட்டையும், வீட்டைச் சுற்றியுள்ள பகுதிகளையும் நுளம்புகள் இனப்பெருக்கம் செய்யாத வகையில் சுத்தமாக வைத்திருப்பது மிகவும் அவசியம்.
நுளம்புகளை கட்டுப்படுத்த பல்வேறு நுளம்புவிரட்டிகள் பயன்படுத்தப்பட்டாலும், சிலர் இயற்கையான வழிகளையும் விரும்புகின்றனர். குறிப்பிட்ட சில தாவரங்களின் நறுமணம் நுளம்புகளை ஓரளவு விரட்ட உதவக்கூடும். எனினும், செடிகளை மட்டும் நம்பி நுளம்புகளையும் டெங்கு அபாயத்தையும் கட்டுப்படுத்த முடியாது என்பதை நினைவில் கொள்ள வேண்டும்.
1. துளசி
துளசி செடியின் இலைகளில் இருந்து வெளிப்படும் நறுமணம் சில பூச்சிகளை விரட்ட உதவக்கூடும். எனவே, துளசி செடியை வீட்டின் பால்கனி அல்லது ஜன்னல் அருகில் தொட்டியில் வளர்க்கலாம்.
இருப்பினும், வீட்டில் துளசி செடி இருப்பதால் நுளம்புகள் முற்றிலும் வீட்டிற்குள் வராது என்று கூற முடியாது. நுளம்புகளை கட்டுப்படுத்த ஏனைய தடுப்பு நடவடிக்கைகளையும் மேற்கொள்வது அவசியம்.
2. புதினா
புதினாவுக்கு இயற்கையான வலுவான நறுமணம் உள்ளது. இதன் காரணமாக புதினா செடியை வீட்டின் ஜன்னல் அல்லது பால்கனி போன்ற பகுதிகளில் வளர்ப்பது சிலருக்கு இயற்கையான கொசு கட்டுப்பாட்டு முறையாக இருக்கலாம்.
புதினாவை வீட்டிலேயே தொட்டியில் எளிதாக வளர்க்க முடிவதால், சமையலுக்கும் பயன்படுத்திக்கொள்ளலாம்.
3. சாமந்தி
அழகான பூக்களுடன் காணப்படும் சாமந்தி செடியையும் வீட்டின் பால்கனி அல்லது வெளிப்புறப் பகுதிகளில் வளர்க்கலாம். இதன் நறுமணம் சில பூச்சிகளைத் தடுக்க உதவக்கூடும்.
ஜன்னல் மற்றும் கதவுகளுக்கு அருகில் செடிகளை வைப்பதுடன், வீட்டிற்குள் நுளம்புக்கள் நுழையாத வகையில் ஜன்னல் வலைகளைப் பயன்படுத்துவதும் பயனுள்ளதாக இருக்கும்.
வேறு என்ன செய்யலாம்?
நுளம்புகளை கட்டுப்படுத்துவதில் மிக முக்கியமான நடவடிக்கை, அவை இனப்பெருக்கம் செய்யக்கூடிய இடங்களை அகற்றுவதாகும்.
வீட்டைச் சுற்றிலும் தேங்கி நிற்கும் நீரை அகற்ற வேண்டும். பூந்தொட்டிகளின் கீழ் வைக்கப்படும் தட்டுகள், பழைய டயர்கள், தேங்காய் ஓடுகள், பயன்படுத்தப்படாத பாத்திரங்கள் உள்ளிட்டவற்றில் நீர் தேங்காமல் பார்த்துக்கொள்ள வேண்டும்.
மேலும், குப்பைகளை முறையாக அகற்றி, வீட்டைச் சுற்றியுள்ள பகுதிகளை சுத்தமாக வைத்திருக்க வேண்டும். தண்ணீர் சேமித்து வைக்கும் பாத்திரங்களை நன்றாக மூடி வைப்பதும் முக்கியம்.
நுளம்புகள் அதிகமாக இருக்கும் பகுதிகளில் கொசு வலை, ஜன்னல் வலை, நீண்ட கை ஆடைகள் மற்றும் உரிய கொசுவிரட்டிகளைப் பயன்படுத்துவது போன்ற கூடுதல் முன்னெச்சரிக்கை நடவடிக்கைகளையும் மேற்கொள்ளலாம்.
கற்பூரம் அல்லது வேப்பிலை போன்ற வீட்டு முறைகள் கொசுக்களை விரட்டும் என பலரும் பயன்படுத்துகின்றனர். ஆனால் இவை மட்டும் டெங்கு போன்ற நுளம்புகளால் பரவும் நோய்களிலிருந்து பாதுகாப்பை உறுதி செய்யாது. குறிப்பாக வீட்டிற்குள் வேப்பிலை உள்ளிட்டவற்றை எரிப்பதால் புகை உருவாகும் என்பதால், குழந்தைகள், முதியவர்கள் மற்றும் சுவாசப் பிரச்சினை உள்ளவர்கள் இருக்கும் இடங்களில் கவனமாக இருக்க வேண்டும்.
எனவே, துளசி, புதினா, சாமந்தி போன்ற செடிகளை வீட்டில் வளர்ப்பது வீட்டை அழகாகவும் நறுமணமாகவும் வைத்திருக்க உதவலாம். ஆனால் நுளம்பு கட்டுப்பாட்டில் முக்கியமானது தேங்கி நிற்கும் நீரை அகற்றுவது மற்றும் நுளம்புகள் கடிப்பதைத் தடுப்பதற்கான பாதுகாப்பு நடவடிக்கைகளை மேற்கொள்வதுதான்.
