ஒருவரின் குணநலன்களைப் பற்றி பிறர் சொல்லும்போது, அதை அறிந்து கொள்ள அனைவருக்கும் ஒரு இயல்பான ஆர்வம் இருக்கும். பொதுவாக ராசி, நட்சத்திரம், பிறந்த தேதி போன்றவற்றின் அடிப்படையில் ஆளுமையை கணிப்பது வழக்கமாக உள்ளது. ஆனால் இதைத் தவிர, உடலமைப்பின் சில அம்சங்களைக் கொண்டும் ஒருவரின் குணத்தைப் பற்றி சொல்ல முடியும்.
கை, கால் விரல்களின் வடிவம், மூக்கு, காது, புருவம், உதடுகள், முகத்தின் அமைப்பு போன்றவை ஒருவரின் ஆளுமையை வெளிப்படுத்தும் அடையாளங்களாக கருதப்படுகின்றன. இத்தகைய ஆளுமை சார்ந்த ஆய்வுகள் சில அளவுக்கு அறிவியல் அடிப்படையிலானவையாகவும் பார்க்கப்படுகின்றன. சில கார்ப்பரேட் நிறுவனங்களில் கூட நேர்முகத் தேர்வுகளின் போது இவ்வகை பார்வைகள் பயன்படுத்தப்படுவதுண்டு.
அந்த வகையில், ஒருவர் கைகளை மடித்து நிற்கும் பழக்கம் அவர்களின் குணநலன்களை எவ்வாறு வெளிப்படுத்துகிறது என்பதையே இங்கு பார்க்கப் போகிறோம். குறிப்பாக, எந்த கை மேலாக இருக்கிறது என்பதன் அடிப்படையில் சில சுவாரஸ்யமான விஷயங்களை அறிந்து கொள்ளலாம்.
இடது கையின் மேல் வலது கை வைத்துக் கொள்பவர்கள்
நீங்கள் நிற்கும்போதோ அல்லது அமர்ந்திருக்கும் போதோ, இடது கையின் மேல் வலது கையை வைத்துக் கொள்வது உங்கள் பழக்கமாக இருந்தால், நீங்கள் உணர்ச்சிகளை மதிப்பவராக இருப்பீர்கள். அதே நேரத்தில், எளிதில் யாருக்கும் உடன்படிப் போகாத தன்மையும் உங்களிடம் இருக்கும். எந்த முடிவையும் எடுப்பதற்கு முன், நன்கு சிந்தித்து, தர்க்க ரீதியாக யோசிப்பதே உங்கள் வழக்கம்.
நீங்கள் பொறுப்புணர்ச்சியும் ஒழுங்கும் கொண்டவராக இருப்பீர்கள். வாழ்க்கையை திட்டமிட்ட முறையில் அணுக விரும்புவீர்கள். எவ்வளவு கடினமான சூழ்நிலை வந்தாலும் அவசரப்படாமல், அமைதியாக யோசித்து முடிவெடுக்கும் திறன் உங்களிடம் அதிகமாக இருக்கும்.
வலது கையின் மேல் இடது கை வைத்துக் கொள்பவர்கள்
நீங்கள் வலது கையின் மேல் இடது கையை வைத்துக் கொண்டு நிற்கும் பழக்கமுடையவராக இருந்தால், நீங்கள் உணர்ச்சிவசப்படும் இயல்புடையவராக இருப்பீர்கள். வலுவான அறிவாற்றலும், ஆழமான உள்ளுணர்வும் உங்களின் முக்கிய அடையாளங்கள்.
வாழ்க்கையில் உணர்வுகளுக்கு அதிக முக்கியத்துவம் கொடுப்பீர்கள். முடிவெடுக்கும் போது முழுவதும் தர்க்கத்தை புறக்கணிக்க மாட்டீர்கள் என்றாலும், உங்கள் உள்ளுணர்வு சொல்லும் பாதையையே அதிகமாக பின்பற்றுவீர்கள். சிருஷ்டிப்புத் திறன், கற்பனை சக்தி மற்றும் மனிதர்களை எளிதில் புரிந்து கொள்ளும் ஆற்றல் உங்களிடம் அதிகமாக காணப்படும்.
