சீஷெல்ஸ், விக்டோரியா ரோச் காய்மன் விளையாட்டரங்கில் ஞாயிற்றுக்கிழமை (27) நடைபெற்ற சீஷெல்ஸ் அணிக்கு எதிரான சிநேகபூர்வ சர்வதேச கால்பந்தாட்டப் போட்டியில் இலங்கை 3 – 0 என்ற கோல்கள் வித்தியாசத்தில் இலகுவாக வெற்றியீட்டியது.
ஆதவன் ராஜமோகன் புகுத்திய இரட்டை கோல்கள் இலங்கையின் வெற்றியில் முக்கிய பங்காற்றி யது.
தெற்காசிய கால்பந்தாட்டத்தில் 31 வருடங்களின் பின்னர் மீண்டும் சம்பியனாக வேண்டும் என்ற குறிக்கோளுடன் இலங்கை கால்பந்தாட்ட சம்மேளனத் தலைவர் ஜஸ்வர் உமரின் ‘Win SAFF again’ திட்டத்திற்கு இந்த வெற்றி உந்துசக்தியாக அமைந்துள்ளது.
இரண்டு அணிகளும் முதலாவது பகுதியில் சம அளவில் மோதிக்கொண்ட வண்ணம் இருந்தன.
எவ்வாறாயினும் இடைவேளைக்கு முன்னரான உபாதையீடு நேரத்தில் சீஷெல்ஸ் வீரர் ஒருவர் தனது பெனல்டி எல்லைக்குள் விதியை மீறியதால் இலங்கைக்கு பெனல்டி வழங்கப்பட்டது.
இந்தப் பெனல்டியை ஆதவன் ராஜமோகன் இலக்கு தவறாமல் கோலினுள் புகுத்தி இலங்கையை 1 – 0 என முன்னிலையில் இட்டார்.
இடைவேளைக்குப் பின்னர் 53ஆவது நிமிடத்தில் மீண்டும் ஆதவன் ராஜமோகன் ப்றீ கிக் மூலம் அலாதியான கோல் ஒன்றைப் போட்டு இலங்கையின் கோல் எண்ணிக்கையை இரண்டாக உயர்த்தினார்.
போட்டியின் 76ஆவது நிமிடத்தில் இலங்கையின் 3ஆவது கோலை டிலொன் டி சில்வா புகுத்தினார்.
இலங்கைக்கும் சீஷெல்ஸுக்கும் இடையிலான இரண்டாவது சிநேகபூர்வ சர்வதேச போட்டி புதன்கிழமை 30ஆம் திகதி நடைபெறவுள்ளது. அதனைத் தொடர்ந்து மொரிஷியஸ் பயணமாகும் இலங்கை அங்கு இரண்டு சிநேகபூர்வ சர்வதேச கால்பந்தாட்டப் போட்டிகளில் விளையாடும்.
