ஸ்ரீ வெங்கடேஸ்வரா சினி சித்ரா பட நிறுவனம் சார்பில் தயாரிப்பாளர் பி வி எஸ் என் பிரசாத் தயாரிப்பில் வெளியாகி வெற்றி பெற்ற திரைப்படம் ‘அஸ்வின்ஸ்’. இதில் வசந்த் ரவி, பிரியா ராமன், சரஸ்வதி மேனன், உதயராஜ், முரளிதரன் உள்ளிட்ட பலர் நடித்திருந்தார்கள்.
அறிமுக இயக்குநர் தருண் தேஜா இயக்கத்தில் ஹாரர் திரில்லர் ஜேனரில் தயாரான இந்த திரைப்படம் படமாளிகையில் வெளியாகி எதிர்பார்த்ததை விட கூடுதலாக வெற்றியை பெற்றது. இதனை பட குழுவினர் ‘அஸ்வின்ஸ்’ வெற்றி பெற்றதற்கு நன்றி தெரிவிக்கும் வகையில் பிரத்யேக விழா ஒன்றினை ஒருங்கிணைத்திருந்தனர். இதில் பட குழுவினர் பங்குபற்றினர்.
படத்தின் நாயகனான வசந்த் ரவி பேசுகையில், “அஸ்வின்ஸ் படத்தின் வெற்றிக்கு அஸ்வினி தேவர்களின் ஆசியே காரணம். ரசிகர்கள் இந்த திரைப்படத்தை மீண்டும் மீண்டும் பட மாளிகைக்கு வருகை தந்து ரசித்ததால் வெற்றி பெற்றது.
இப்படத்தின் வெளியீட்டிற்கு முதல் நாள் இயக்குநரும், நண்பருமான தருண் தேஜா தவிப்புடனும், பதற்றத்துடனும் இருந்தார். நான் அவரிடம், ‘நாம் தரமான படைப்பைத்தான் ரசிகர்களிடம் வழங்கி இருக்கிறோம். அவர்கள் அதனை பார்த்து ரசித்து வெற்றி பெறச் செய்வார்கள்.
கவலைப்பட வேண்டாம் என உறுதியாக சொன்னேன். படம் வெளியாகி இரண்டு நாள் கழித்து தமிழகம் முழுவதும் இப்படத்திற்கு ரசிகர்களிடம் பெரும் வரவேற்பு கிடைத்தது.
அதனை நாங்கள் நேரடியாக படமாளிகைக்கு சென்ற போது கண்டு உணர்ந்தோம். இந்தப் படத்தில் வெற்றிக்கு தயாரிப்பாளர், இயக்குநர் உள்ளிட்ட தொழில்நுட்பக் கலைஞர்களும், நடிகர்களும் அவர்களின் கடுமையான அர்ப்பணிப்புடன் கூடிய உழைப்பும் காரணம்.
மேலும் இந்தத் திரைப்படத்தை ஊடகங்களும் கொண்டாடின. இதனால் மக்கள் படமாளிகைக்கு வருகை தந்து கண்டு ரசித்தனர்” என்றார்.
“இப்படத்தின் வெற்றிக்கு நாயகனாக இரட்டை வேடத்தில் நடித்த வசந்த் ரவியின் கடும் உழைப்புதான் காரணம். குறிப்பாக உச்சகட்ட காட்சியில் எங்களுக்கு கிடைத்த குறைவான கால அவகாசத்திற்குள் 16 முறை உடைமாற்றி வேறு கதாபாத்திரமாக மாறி மாறி நடித்து எங்களை அசத்தினார்.” என அறிமுக இயக்குநர் தருண் தேஜா குறிப்பிட்டார்.