தமிழ் திரையுலகில் ஏராளமான வெற்றி பெற்ற பாடலை எழுதிய பாடலாசிரியர் பிரியன், ‘அரணம்’ எனும் திரைப்படத்தின் மூலம் தமிழில் கதையின் நாயகனாக அறிமுகமாகிறார்.
அறிமுக இயக்குநர் பிரியன் இயக்கத்தில் தயாராகும் முதல் திரைப்படம் ‘அரணம்’. இதில் பாடலாசிரியர் பிரியன் கதையின் நாயகனாக நடிக்க, அவருக்கு ஜோடியாக நடிகை வர்ஷா நடித்திருக்கிறார். இவர்களுடன் லகுபரன், கீர்த்தனா உள்ளிட்ட பலர் நடித்திருக்கிறார்கள். நித்தின் கே. ராஜ் ஆகிய இ.ஜெ. நௌஷத் ஆகிய இருவரும் இணைந்து ஒளிப்பதிவு செய்திருக்கும் இந்த திரைப்படத்திற்கு சாஜன் மாதவ் இசையமைத்திருக்கிறார். ஹாரர் கிரைம் திரில்லர் ஜேனரில் தயாராகி இருக்கும் இந்த திரைப்படத்தை தமிழ் திரைக்கூடம் எனும் பட நிறுவனம் தயாரித்திருக்கிறது.
படத்தைப் பற்றி இயக்குநர் பேசுகையில், ” ஒரு மனிதனின் வாழ்வில் நடக்கும் சில சம்பவங்களை அவர் எதிர்கொள்ளும் போது உண்டாகும் எதிர்பாராத நிகழ்வுகள், யூகிக்க இயலாத வகையிலான திரைக்கதையில் ‘அரணம்’ உருவாகி இருக்கிறது. படத்தின் முதல் பாதிக்கும், இரண்டாம் பாதிக்கும் வித்தியாசமான திரைக்கதை அமைக்கப்பட்டிருப்பதால் பார்வையாளர்களுக்கு பிரத்யேகமான அனுபவத்தை வழங்கும்.” என்றார்.
இந்தத் திரைப்படத்தின் இறுதி கட்ட படப்பிடிப்பு விறுவிறுப்பாக நடைபெற்று வருகிறது. இந்நிலையில் படத்தின் நாயகனும் பாடலாசிரியருமான பிரியனின் பிறந்தநாளை முன்னிட்டு, ‘அரணம்’ படத்தின் ஃபர்ஸ்ட் லுக் வெளியிடப்பட்டிருக்கிறது.
