நகைச்சுவை நடிகர் ஆர். ஜே. விக்னேஷ் காந்த் முதன்மையான வேடத்தில் நடித்திருக்கும் ‘பாபா பிளாக்ஷீப்’ எனும் திரைப்படத்தின் முன்னோட்டம் வெளியிடப்பட்டிருக்கிறது.
அறிமுக இயக்குநர் ராஜ்மோகன் இயக்கத்தில் தயாராகி இருக்கும் முதல் திரைப்படம் ‘பாபா பிளாக்ஷீப்’. இதில் சேட்டை ஷெரீப் உள்ளிட்ட பத்து இணையதள நட்சத்திரங்கள் கதையின் நாயகர்களாக அறிமுகமாகி இருக்கிறார்கள்.
இவர்களுடன் நடிகர்கள் போஸ் வெங்கட், சுரேஷ் சக்கரவர்த்தி, சுப்பு பஞ்சு, இளவரசு, ஆர் ஜே விக்னேஷ் காந்த் நடிகைகள் வினோதினி, அம்மு அபிராமி, அபிராமி உள்ளிட்ட பலர் நடித்திருக்கிறார்கள்.
சுதர்சன் சீனிவாசன் ஒளிப்பதிவு செய்திருக்கும் இந்த திரைப்படத்திற்கு சந்தோஷ் தயாநிதி இசையமைத்திருக்கிறார்.
பாடசாலையில் பயிலும் மாணவர்களின் வாழ்வியலை மையப்படுத்தி தயாராகி இருக்கும் இந்த திரைப்படத்தை ரோமியோ பிக்சர்ஸ் எனும் பட நிறுவனம் சார்பில் தயாரிப்பாளர் ராகுல் தயாரித்திருக்கிறார்.
இப்படத்தின் ஃபர்ஸ்ட் லுக், டீசர், பாடல்கள் ஆகியவை வெளியாகி வெற்றி பெற்ற நிலையில், இப்படத்தின் இசை மற்றும் முன்னோட்டம் வெளியிடப்பட்டிருக்கிறது. இதற்காக சென்னையில் நடைபெற்ற பிரம்மாண்டமான விழாவில் தமிழ் திரையுலகின் முன்னணி பிரபலங்களான கே. எஸ். ரவிக்குமார், லிங்குசாமி, ஓபிலி கிருஷ்ணா, வாணி போஜன் உள்ளிட்ட ஏராளமானவர்கள் சிறப்பு அதிதியாக பங்கு பற்றினர்.
‘பாபா பிளாக் ஷீப்’ படத்தின் முன்னோட்டத்தில் பாடசாலை என்றவுடன் பார்வையாளர்களின் நனவோடையில் இடம்பெறும் குறும்பும் இளமையும் ததும்பும் காட்சிகள் இடம்பெற்றிருக்கிறது. ஆடல், பாடல், கொண்டாட்டம், சென்டிமென்ட், எக்சன், காதல் என கொமர்சல் அம்சங்கள் சரியான விகிதத்தில் இடம் பிடித்திருப்பதால் ‘பாபா பிளாக்ஷீப்’ படத்திற்கு ரசிகர்களிடையேயும், திரையுலக வணிகர்களிடையேயும் பெரும் எதிர்பார்ப்பு ஏற்பட்டிருக்கிறது.
இதனிடையே இந்த திரைப்படம் ஜூன் 29 ஆம் திகதியன்று வெளியாகும் என அறிவிக்கப்பட்டுள்ளது.
