ஹோட்டலில் பரோட்டாவுடன் பரிமாறப்படும் சால்னாவுக்கு தனி சுவை உண்டு. மசாலாவின் மணம், காரம், தேங்காயின் சுவை என அனைத்தும் சேர்ந்து இருக்கும் இந்த சால்னாவை வீட்டிலேயே எளிதாகத் தயாரிக்கலாம்.
பரோட்டாவுக்கு மட்டுமல்லாமல் சப்பாத்தி, தோசை, இட்லி மற்றும் இடியப்பத்துடனும் இந்த சால்னா மிகவும் சுவையாக இருக்கும்.
தேவையான பொருட்கள்
வெங்காயம் – 2
தக்காளி – 2
பச்சை மிளகாய் – 2
இஞ்சி-பூண்டு விழுது – 1 தேக்கரண்டி
கறிவேப்பிலை – சிறிதளவு
கொத்தமல்லித்தழை – சிறிதளவு
எண்ணெய் – 3 மேசைக்கரண்டி
பட்டை – 1 சிறிய துண்டு
கிராம்பு – 3
ஏலக்காய் – 2
பிரியாணி இலை – 1
சோம்பு – ½ தேக்கரண்டி
மசாலாவுக்கு
மிளகாய்த்தூள் – 1 தேக்கரண்டி
மல்லித்தூள் – 1½ தேக்கரண்டி
மஞ்சள்தூள் – ¼ தேக்கரண்டி
கரம் மசாலா – ½ தேக்கரண்டி
சீரகத்தூள் – ½ தேக்கரண்டி
உப்பு – தேவையான அளவு
அரைக்க
தேங்காய்த் துருவல் – ½ கப்
முந்திரி – 5
சோம்பு – ½ தேக்கரண்டி
கசகசா – ½ தேக்கரண்டி
சிறிதளவு தண்ணீர்
சால்னா செய்வது எப்படி?
முதலில் தேங்காய்த் துருவல், முந்திரி, சோம்பு மற்றும் கசகசாவை சிறிதளவு தண்ணீர் சேர்த்து நன்றாக மைய அரைத்து வைத்துக்கொள்ளுங்கள்.
ஒரு பாத்திரத்தில் எண்ணெய் ஊற்றி சூடானதும் பட்டை, கிராம்பு, ஏலக்காய், பிரியாணி இலை மற்றும் சோம்பு சேர்த்து தாளிக்கவும்.
பின்னர் நறுக்கிய வெங்காயம், பச்சை மிளகாய் மற்றும் கறிவேப்பிலையை சேர்த்து வெங்காயம் பொன்னிறமாகும் வரை நன்றாக வதக்கவும்.
அதனுடன் இஞ்சி-பூண்டு விழுதை சேர்த்து பச்சை வாசனை போகும் வரை வதக்குங்கள்.
பின்னர் நறுக்கிய தக்காளியை சேர்த்து நன்றாக குழையும்வரை வேகவிடவும்.
தக்காளி நன்றாக மசிந்ததும் மிளகாய்த்தூள், மல்லித்தூள், மஞ்சள்தூள், சீரகத்தூள், கரம் மசாலா மற்றும் உப்பு சேர்த்து குறைந்த தீயில் நன்றாக வதக்கவும்.
இப்போது அரைத்து வைத்துள்ள தேங்காய் மசாலாவை சேர்த்து நன்றாகக் கிளறவும். பின்னர் தேவையான அளவு தண்ணீர் ஊற்றி சால்னா பதத்திற்கு கலக்கவும்.
பாத்திரத்தை மூடி மிதமான தீயில் சுமார் 10 முதல் 15 நிமிடங்கள் கொதிக்க விடவும். சால்னா நன்றாக கொதித்து மசாலாவின் மணம் வந்ததும், மேலே சிறிதளவு கொத்தமல்லித்தழையை தூவி அடுப்பை அணைக்கலாம்.
ஹோட்டல் ஸ்டைல் பரோட்டா சால்னா தயார்!
சூடாக இருக்கும் பரோட்டாவை சிறிது சிறிதாக பிய்த்து, அதனுடன் இந்த காரமான சால்னாவை ஊற்றி சாப்பிட்டால் ஹோட்டல் சுவையை வீட்டிலேயே ருசிக்கலாம்.
சால்னா மிகவும் கெட்டியாக இருந்தால் சிறிதளவு சூடான தண்ணீர் சேர்த்து கலக்கலாம். பரோட்டாவுடன் பரிமாறுவதற்கு சால்னாவை சற்று தண்ணீராக வைத்தால் அதன் சுவை இன்னும் நன்றாக இருக்கும்.
