தென்னாபிரிக்காவைச் சேர்ந்த இந்திய வம்சாளி தமிழரான நவநீதம் “நவி” பிள்ளைக்கு அமைதிக்கான நோபல் பரிசு வழங்கப்பட்டுள்ளது.
நோர்வே நோபல் குழுவின் தலைவர் ஜோர்கன் வாட்னே ஃப்ரைட்னஸ் இந்த அறிவிப்பை வெளியிட்டார்.
போர்க்குற்றங்கள், மனிதகுலத்திற்கு எதிரான குற்றங்கள் மற்றும் இனப்படுகொலைகள் தொடர்பான வழக்குகள் நீதிமன்றங்களில் விசாரிக்கப்பட்டு, குற்றவாளிகள் சட்டத்தின் முன் நிறுத்தப்படுவதை உறுதிப்படுத்துவதில் நவி பிள்ளை முக்கிய பங்காற்றியுள்ளதாக நோபல் குழு தெரிவித்துள்ளது.
துணிச்சலுடனும் நேர்மையுடனும் விரிவான உலகளாவிய சட்ட ஒழுங்கை உருவாக்குவதற்கு அவர் வழிகாட்டியுள்ளதாகவும், சர்வதேச சட்டத்தின் அடிப்படைக் கோட்பாடுகளுக்கு அவர் கொண்டுள்ள அர்ப்பணிப்பு அவரது நீண்டகாலப் பணிகளில் தொடர்ந்து வெளிப்பட்டுள்ளதாகவும் நோபல் குழு குறிப்பிட்டுள்ளது.
தென்னாபிரிக்காவின் டேர்பன் நகரில் நிறவெறி ஆட்சிக்காலத்தில் இந்தியத் தமிழ் வம்சாவளிக் குடும்பத்தில் பிறந்த நவி பிள்ளை, சட்டத்துறையில் முன்னோடியாகத் திகழ்ந்தார். இனப் பாகுபாடு, பிரிவினை மற்றும் சமூகத்தில் புறந்தள்ளல் ஆகியவற்றுக்கு எதிராகப் போராடிய அவர், பின்னர் சர்வதேச நீதித்துறையில் முக்கியப் பொறுப்புகளை வகித்தார்.
நெல்சன் மண்டேலா உள்ளிட்ட நிறவெறி எதிர்ப்புப் போராட்டத்தில் ஈடுபட்டவர்களைப் பாதுகாப்பதில் ஆரம்பகாலத்தில் பங்களித்த அவர், பின்னர் தென்னாபிரிக்க உயர் நீதிமன்றம், ருவாண்டாவுக்கான சர்வதேச குற்றவியல் தீர்ப்பாயம் மற்றும் சர்வதேச குற்றவியல் நீதிமன்றம் உள்ளிட்ட அமைப்புகளில் நீதிபதியாகப் பணியாற்றினார்.
மேலும், ஐக்கிய நாடுகள் சபையின் மனித உரிமைகள் உயர்ஸ்தானிகராகவும் அவர் பணியாற்றியுள்ளார். அவர் மனித உரிமைகள் உயர்ஸ்தானிகராக பணியாற்றிய காலத்தில் இலங்கைக்கு விஜயம் மேற்கொண்டு தமிழர்கள் மீதான பிரச்சினை குறித்தும் விசாரணைகளை மேற்கொண்டார்.
சர்வதேச சட்ட நிறுவனங்களை வலுப்படுத்துவதிலும், போர் மற்றும் வன்முறைகளைத் தடுப்பதில் சட்டரீதியான நடவடிக்கைகளின் முக்கியத்துவத்தை எடுத்துரைப்பதிலும் நவி பிள்ளையின் பங்களிப்பு குறிப்பிடத்தக்கது என நோபல் குழு தெரிவித்துள்ளது.
அவரது சுதந்திரமான அணுகுமுறை, நிபுணத்துவம் மற்றும் உறுதிப்பாடு ஆகியவை அவரை நமது காலத்தின் மதிப்புமிக்க சர்வதேச சட்ட நிபுணர்களில் ஒருவராக உயர்த்தியுள்ளதாகவும் தெரிவிக்கப்பட்டுள்ளது.
