கர்ப்பிணி தாய்களின் கதறல்கள்
கற்பனைகளோடு பள்ளி சென்ற
பிள்ளைகளின் சிதைந்த உடல்கள்
சிதறிய உறவுகளை தேடும் பணிகள்
பாதையில் சென்று
பயணத்தை அடையாமல்
பள்ளத்திற்குள் விழுந்து
பரிதாபமாய் உயிர் போகும் அவலங்கள்
வல்லமை காட்ட விளையும்
வாகன ஓட்டுநர்களே!
நம்பி வருவோரை
நல்லபடியாய் கொண்டு சேர்க்க
உள்ளம் உறுதி கொள்ளுங்களே!
போட்டி போட்டுக் கொண்டு
விட்டுக்கொடுக்க மனமின்றி
கட்டுப்பாட்டை தவறவிட்டு
காவு கொள்வதோ உயிர்களை
கழுத்துகளையும் தாண்டி வழியும்
கண்ணீரிடம் கேளுங்கள்
உயிர்களின் விலையை
ஒற்றை வினாடி
காத்திருக்க பொறுமையின்றி
அற்புதமான உயிரை
அற்பமாய் இழக்க வேண்டுமா?
பொறுப்பை உணராமல்
பரபரப்பாய் சென்று
பரிதவிக்க வைக்காதீர்
இனிமேலாவது
அதிக வேகம் தவிர்த்து
அவசர போக்கு விடுத்து
உங்களை கடவுளென நம்புவோரை
காப்பாற்றி ஊர் சேர்ப்பதே மேன்மையானது
யுகநாதன்