தமிழ் மக்களின் உரிமைக்காக ஐந்தம்சக் கோரிக்கைகளை முன்வைத்து நீராகாரமின்றி 12 நாட்கள் உண்ணாவிரதமிருந்து உயிர்நீத்த தியாக தீபம் திலீபன் அவர்களுக்கு வன்னிமாவட்ட பாராளுமன்ற உறுப்பினர் துரைராசா ரவிகரன் பாராளுமன்றில் அஞ்சலி செலுத்தியுள்ளார்.
பாராளுமன்றில் வியாழக்கிழமை (24) உரையாற்றும்போதே அவரால் இவ்வாறு அஞ்சலிசெலுத்தப்பட்டுள்ளது.
அந்தவகையில் இறையாகி எங்கள் உயிரோடும் உணர்வோடும் வழியோடும் இரண்டு அறக் கலந்து வாழும் எங்கள் தியாக தீபம் திலீபனை வணங்கி இப்பேரவையில் அஞ்சலிப்பதாகத் தெரிவித்துள்ளார்.
இதன்போது அவர் மேலும் கருத்துத் தெரிவிக்கையில்,
கடந்த கால எங்களின் காயங்கள் ஆற்றப்படாமல் இந்த தீவிலே நல்லிணக்கம் சாத்தியமாகாது. புரிந்தவனே நடுநிலையாகி தீர்ப்புச்சொல்லும் உள்ளகப் பொறிமுறையில் எங்கள் மக்களுக்கு நம்பிக்கை இல்லை.
அகிம்சை வென்ற இடம் வேண்டுமானால் இந்தியாவாக இருக்கலாம். ஆனால், அந்த இந்தியாவும் பார்த்திருக்க அகிம்சையையும் தோற்கடித்தது இலங்கை அரசு.
பயங்கரவாத மற்றும் அவசர காலச் சட்டங்களின் கீழ் சிறைகளில் உள்ள தமிழ் அரசியல் கைதிகளை விடுதலை செய்யுங்கள்; வடகிழக்கு மாகாணங்களில் இடம்பெறும் திட்டமிட்ட சிங்களக் குடியேற்றங்களை நிறுத்துங்கள்
என்று கோரி பன்னிருநாள் பசித்திருந்து நீருமின்றி நோன்பிருந்து எங்களுக்காய் – எம் இனத்துக்காய் தன் இன்னுயிரை ஆகுதியாக்கிய எங்கள் தியாக தீபம் திலீபன் உயிர் நீத்து இன்றளவில் 39 ஆண்டுகள் நிறைவடைகின்றன. எங்களுக்காக இன்னும் பசித்திருக்கிறான்.
இந்தப்பேரவையிலே, எங்கள் அகிம்சைச்சுடருக்கு – இறையாகி எங்கள் உயிரோடும் உணர்வோடும் வழியோடும் இரண்டு அறக் கலந்து வாழும் எங்கள் தியாக தீபம் திலீபனை வணங்கி இப்பேரவையில் அஞ்சலிக்கிறேன்.
