புலரும் பொழுதிலே பூவையர் விழித்திங்கே
பூக்கோளம் இடுகின்றார் பூவிழி வாசலிலே
மலரும் செம்பருத்தி மகிழ்விக்கும் வர்ணத்தில்
வான்வெளியும் சிவந்திடவே வான்பரப்பைக் கடக்கின்றான்
வளரும் தேசத்தில் வசந்தம் நிறைந்திடவே
வன்முறை தவிர்த்திடவே வந்துதவ வேண்டுமே
சிலரின் செய்கையால் சீர்க்கெட்டு போகின்ற
சிறந்த தேசத்தின் சிறப்பைக் காத்திடவே
நினைவகத்தில் நிறைந்துள்ள நிறைவேறா ஆசைகளை
நிறைவேற்றித் தந்திடுவாய் நிறப்பிரிகை நாயகனே
அனைத்துலகும் இன்புறவே அன்பாலே பயனுறவே
உனைத்தானே கேட்கிறோம் ஊர்க்காவல் சேவகனே
மனையெல்லாம் மகிழ்ந்திடவே
மனைமாட்சி சிறந்திடவே மனசாட்சி செய்யட்டும்
மகத்தான அரசாட்சியே இறையாட்சி செய்திடவே
இமயத்தில் வீற்றிருக்கும் ஈசனும் முயல்கின்றான் இரவியின் துணையோடு
இலைமறை காயாக இரவியும் சொல்கின்றான்
இறையாண்மை காத்திடுங்கள் இதயங்கள் இதமாகும்
தலைமுறை தழைத்தோங்கும் தன்னலம் தேடாது
தரணியெலாம் பயனுறவே தமிழாக நிலைக்கையிலே
அலைக்கடல் போலெழுந்து அயராது முயற்சித்து
அடியெடுத்து வைத்திடவே அகிலத்தை வென்றிடலாம்
மலைப்பான மனக்கடலை மகிழ்வோடு நீந்திடவே
மரணத்தை வென்றிடலாம் மானுடத்தில் உயர்ந்திடலாம்
சூதில்லா சூரியன் சுழன்றோடும் வையத்தில் சுழலாமல்
நின்றிங்கு செங்கதிரைத் தந்திடவே
தோதில்லா கானகமும் தொடுவான வான்வெளியும்
திரைக்கடல் யாவையுமே தினகரன் நிறைகின்றான்
ஆதியாக திகழ்கின்ற அனலியான அருணனும்
அன்றாடம் தோன்றியே ஆண்டவனாய்த் தெரிகின்றான்
வேதியியல் போலவே வெவ்வேறு சாதியங்கள்
ஊரெங்கும் நிறைந்திடவே ஊற்றெடுக்கும் வன்முறைகள்
இல்லாமல் ஆக்கிடவே இயற்கையைக் காத்திடவே
திங்களில் வந்திடுவாய் திசைக்காட்டும் தினசரியே .
-கோ.பூமணி
