நடிகர்-நடிகைகள் தற்கொலை சம்பவங்கள் தொடர்ந்து நடப்பது திரையுலகினர் மத்தியில் வருத்தத்தை ஏற்படுத்தி உள்ளது. ‘தர்மயுத்தம்’ படத்தில் ரஜினிகாந்த் தங்கையாக நடித்த லட்சுமிஸ்ரீ 1979-ல் தூக்கில் தொங்கி இறந்தார். நடிகை படாபட் ஜெயலட்சுமி 1979-ல் தற்கொலை செய்துகொண்டார். நடிகை ஷோபா 1980-ல் தனது 18-வது வயதில் தூக்கில் தொங்கினார். கவர்ச்சி நடிகை சில்க் சுமிதா 1996-ல் தூக்கில் பிணமாக தொங்கினார். காதல் தோல்வி, பண நெருக்கடியால் அவர் தற்கொலை செய்து கொண்டதாக கூறப்பட்டது.
நடிகை விஜி மகாலிங்கபுரத்தில் உள்ள தனது வீட்டில் காதல் தோல்வியால் தூக்கில் தொங்கி இறந்தார். நடிகை சிம்ரன் தங்கை மோனல் 2002-ல் காதல் தோல்வியால் தூக்குப்போட்டு தற்கொலை செய்து கொண்டார். அதே வருடம் நடிகை பிரதியுஷாவும் விஷம் குடித்து இறந்தார். டி.வி. நடிகைகள் ஷ்ரதா, மயூரி, வைஷ்ணவி, ஷாலினி ஆகியோரும் மன அழுத்தத்தால் தற்கொலை செய்துகொண்டார்கள். 2011-ல் நகைச்சுவை நடிகை சோபனாவும், 2014-ல் நடிகர் முரளிமோகனும் தற்கொலை செய்துகொண்டனர்.
காதல் தோல்வி, குடும்ப பிரச்சினைகள், பணக்கஷ்டம், விவாகரத்துகள் போன்றவைகளால் ஏற்படும் மன உளைச்சல்களே இதுபோன்ற தற்கொலைகளுக்கு காரணமாக இருக்கிறது என்று கூறப்படுகிறது. எனவே தற்கொலை முடிவுகளை தடுக்க நடிகர்-நடிகைகளுக்கு ‘கவுன்சிலிங்’ அளிக்க வேண்டும் என்று வற்புறுத்தப்பட்டு உள்ளது.
இதுகுறித்து நடிகர் சங்க துணைத்தலைவர் கருணாஸ் கூறும்போது, ‘‘நடிகர்-நடிகைகள் தற்கொலை முடிவுகளுக்கு தூண்டப்படுவது வருத்தம் அளிக்கிறது. இந்த உலகத்தில் தீர்க்க முடியாத பிரச்சினைகள் எதுவும் இல்லை. சமூகத்தில் பிரச்சினைகளை எதிர்கொண்டு தைரியமாக வாழ கற்றுக்கொள்ள வேண்டும். நடிகர் சங்கத்தை பொறுத்தவரை நடிகர்-நடிகைகள் பிரச்சினைகளுக்கு தீர்வு காண எப்போதும் தயாராக இருக்கிறது. பிரச்சினைகளை போனில் சொன்னால் போதும். உதவ தயாராக இருக்கிறோம்’’ என்றார்.
