சீஷேல்ஸ் அணிக்கு எதிரான சிநேகபூர்வ சர்வதேச கால்பந்தாட்டத்தில் நான்கு நாட்களுக்குள் இரண்டாவது தடவையாக இலங்கை வெற்றியீட்டி வரலாறு படைத்தது.
சீஷெல்ஸ் அணிக்கு எதிராக கடந்த ஞாயிற்றுக்கிழமை 3 – 0 என்ற கோல்கள் வித்தியாசத்தில் வெற்றியீட்டிய இலங்கை புதன்கிழமை (30) நடைபெற்ற இரண்டாவது போட்டியில் 2 – 0 என்ற கோல்கள் வித்தியாசத்தில் வெற்றியீட்டியது.
மாஹே ஐலண்ட்ஸ் விளையாட்டரங்கில் புதன்கிழமை (30) நடைபெற்ற போட்டியின் 32ஆவது நிமிடத்தில் இடப்புறத்திலிருந்து பந்தை நகர்த்திச் சென்ற டிலொன் டி சில்வா அலாதியான கோல் ஒன்றைப் போட்டு இலங்கை அணியை முன்னிலையில் இட்டார்.
தொடர்ந்து திறமையாக விளையாடிய இலங்கை அணி, எதிரணியின் கோல் எல்லையை ஆக்கிரமித்த போதிலும் கோல் வாய்ப்புகள் தவறவிட்டப்பட்டன.
போட்டியின் 84ஆவது நிமிடத்தில் வலப்புறத்திலிருந்து பந்தை உட்புறமாக நகர்த்திச் சென்ற மாற்று வீரர் மொஹம்மத் வசீம் இரண்டாவது கோலை புகுத்தினார்.
இறுதியில் இலங்கை 2 – 0 என்ற கோல்கள் கணக்கில் வெற்றியீட்டியது.
