இங்கிலாந்தின் நாட்டிங்ஹாம் (Nottingham) நகர மையத்தில் உள்ள எஸ்கோபார் கட்டிடத்தில் (Escobar building) ஏற்பட்ட பெரும் தீ விபத்து தொடர்பாக, 12 மற்றும் 14 வயதுடைய இரு சிறுவர்கள் தீ வைப்பு சந்தேகத்தின் பேரில் கைது செய்யப்பட்டுள்ளனர்.
திங்கள்கிழமை இரவு சுமார் 10 – 11 மணியளவில் மார்க்கெட் வீதியில் உள்ள கட்டிடத்தில் தீ விபத்து ஏற்பட்டதாகத் தகவல் கிடைத்தது.
கட்டிடத்தில் தொடங்கிய தீ, வேகமாக மேல் தளங்களுக்கும் கூரைக்கும் பரவியது.
சம்பவ இடத்துக்கு 12 தீயணைப்பு வாகனங்கள் வரவழைக்கப்பட்டுத் தீயைக் கட்டுப்படுத்தும் பணிகள் தீவிரமாக மேற்கொள்ளப்பட்டன. தற்போது தீ முற்றிலும் அணைக்கப்பட்டுவிட்டபோதிலும், தீயணைப்பு வீரர்கள் தொடர் தணிப்புப் பணிகளிலும் கட்டிடத்தின் உறுதித்தன்மையை ஆய்வு செய்யும் பணியிலும் ஈடுபட்டு வருகின்றனர்.
இச்சம்பவத்தில் யாருக்கும் பலத்த காயமோ அல்லது உயிரிழப்போ ஏற்படவில்லை என மீட்புப் படையினர் உறுதிப்படுத்தியுள்ளனர்.
முன்னெச்சரிக்கை நடவடிக்கையாகக் கட்டிடத்திலிருந்து சுமார் 12 குடியிருப்பாளர்களும், 3 முதல் 4 வணிக நிறுவனங்களைச் சேர்ந்தவர்களும் பாதுகாப்பாக வெளியேற்றப்பட்டனர்.
இச்சம்பவம் தொடர்பாக நாட்டிங்ஹாம் பொலிஸ் விசாரணை மேற்கொண்டு, தீவைப்பு மற்றும் குற்றவியல் சேதம் ஏற்படுத்திய சந்தேகத்தின் பேரில் 12 மற்றும் 14 வயதுடைய இரு சிறுவர்களைக் கைது செய்து, காவலில் வைத்து விசாரித்து வருகிறது.
தீ விபத்துக்கான முதன்மைக் காரணத்தைக் கண்டறியத் தீயணைப்புத் துறையுடன் இணைந்து பொலிஸார் தீவிர ஆய்வு நடத்தி வருகின்றனர்.
இத்தீ விபத்துக் காரணமாக நகர மையத்தில் கடும் போக்குவரத்துப் பாதிப்பு ஏற்பட்டது. அப்பர் பார்லமென்ட் வீதி (Upper Parliament Street), மார்க்கெட் வீதி, கிங் வீதி உள்ளிட்ட பல முக்கிய வீதிகள் மூடப்பட்டு, பின்னர் ஒரு வழிப் பாதையாகத் திறக்கப்பட்டன.
பாதுகாப்புக் கருதி மேல்நிலை மின்சார வடங்கள் துண்டிக்கப்பட்டதால், நகர மையப் பகுதியில் டிராம் (Tram) சேவைகள் நிறுத்தப்பட்டன. பஸ்களும் மாற்று வீதிகளில் திருப்பி விடப்பட்டன.
மார்க்கெட் வீதி பல் மருத்துவமனை, ஜோசஃபின்ஸ் (Josephine’s) உணவகம் உள்ளிட்ட பல வணிக நிறுவனங்கள் அமைந்துள்ள பகுதி பொலிஸ் துறையினரின் கட்டுப்பாட்டு வளையத்துக்குள் கொண்டுவரப்பட்டதால் அவற்றின் செயல்பாடுகளும் பாதிக்கப்பட்டன.
