13 நாடுகளைச் சேர்ந்த ஆய்வாளர்கள் பங்கேற்பு – 96 ஆய்வுக் கட்டுரைகள் சமர்ப்பிப்பு
கனடா, ரொறன்ரோ: அனைத்துலகத் தமிழர் பேரவையின் (Federation of Global Tamils) ஏற்பாட்டில் நடைபெற்ற உலகத் தமிழ் ஆய்வு மாநாடு 2026, கனடாவின் ரொறன்ரோ நகரில் சிறப்பாக நிறைவடைந்துள்ளது. அக்டோபர் 15ஆம் திகதி தொடங்கி 18ஆம் திகதி வரை நடைபெற்ற இம்மாநாடு, தமிழ்மொழி, பண்பாடு, வரலாறு மற்றும் நவீன தொழில்நுட்ப வளர்ச்சியில் தமிழின் பங்களிப்பு குறித்த சர்வதேச அளவிலான அறிவுப் பரிமாற்றத்திற்கான முக்கிய தளமாக அமைந்தது.
‘செயற்கை நுண்ணறிவு உலகில் செம்மொழித் தமிழும் தமிழரும்’ என்ற கருப்பொருளில் நடைபெற்ற இம்மாநாட்டில், 13 நாடுகளைச் சேர்ந்த ஆய்வாளர்களின் 96 ஆய்வுக் கட்டுரைகள் இடம்பெற்றன. உலகின் பல்வேறு நாடுகளில் வாழும் தமிழ் அறிஞர்கள், ஆய்வாளர்கள், கல்வியாளர்கள் மற்றும் தமிழார்வலர்கள் இம்மாநாட்டில் பங்கேற்றனர்.
ரொறன்ரோவில் அமைந்துள்ள சென்டென்னியல் கல்லூரி வளாகத்தில் மாநாட்டின் தொடக்க நிகழ்வுகள் நடைபெற்றன. மரபிசை நிகழ்ச்சிகளும் ஊர்வலமும் தொடக்க நிகழ்வுகளுக்கு சிறப்புச் சேர்த்தன. மறைமலையடிகள், தனிநாயகம் அடிகள், ஜி.யு. போப் ஆகியோரின் உருவப்படங்கள் ஊர்வலத்தில் எடுத்துச் செல்லப்பட்டமை தமிழ்மொழி மற்றும் தமிழாய்வு வரலாற்றின் முக்கிய ஆளுமைகளை நினைவுகூரும் நிகழ்வாக அமைந்தது.
அனைத்துலகத் தமிழர் பேரவையின் தலைவரும் மாநாட்டின் வழிகாட்டுதல் குழுத் தலைவருமான நிமல் விநாயகமூர்த்தி வரவேற்புரை நிகழ்த்தினார். உலகெங்கும் பரவியுள்ள தமிழர்களின் அறிவு, அனுபவம், திறமை மற்றும் வளங்களை ஒருங்கிணைத்து, தமிழாய்வுக்கும் தமிழ்ச் சமூகத்தின் முன்னேற்றத்துக்கும் பயன்படுத்த வேண்டியதன் அவசியத்தை அவர் வலியுறுத்தினார்.
1974ஆம் ஆண்டு யாழ்ப்பாணத்தில் நடைபெற்ற நான்காவது உலகத் தமிழ் ஆராய்ச்சி மாநாட்டின் வரலாற்று முக்கியத்துவத்தையும் நினைவுகூர்ந்த அவர், அப்போது வெளிப்பட்ட தமிழுணர்வையும் அறிவுப் பகிர்வையும் இன்றைய தலைமுறையின் தேவைகளுடன் இணைக்கும் நோக்கில் தற்போதைய மாநாடு முன்னெடுக்கப்பட்டதாகக் குறிப்பிட்டார்.
செம்மொழித் தமிழ், செயற்கை நுண்ணறிவு, மொழித் தொழில்நுட்பம், தத்துவம், பண்பாடு மற்றும் பாரம்பரியம், புலம்பெயர் தமிழர் ஆய்வுகள், வரலாறு, பொருளாதாரம், மொழிக் கொள்கை, சமூக முன்னேற்றம் உள்ளிட்ட பல்வேறு துறைகள் மாநாட்டின் ஆய்வுப் பரப்பில் இடம்பெற்றன.
குறிப்பாக, செயற்கை நுண்ணறிவு மற்றும் புதிய தொழில்நுட்பங்களின் வளர்ச்சிக்கு ஏற்ப தமிழ்மொழியின் பயன்பாட்டை விரிவுபடுத்துவது, தமிழ் இலக்கியச் செல்வங்களைப் பாதுகாத்து அடுத்த தலைமுறைக்குக் கொண்டுசெல்வது, உலகளாவிய கல்வி மற்றும் ஆய்வுத் துறைகளில் தமிழின் பங்களிப்பை வலுப்படுத்துவது போன்ற விடயங்களுக்கு முக்கியத்துவம் அளிக்கப்பட்டது.
நாற்பது ஆண்டுகளுக்கும் மேலாகப் பல்வேறு நாடுகளுக்குப் புலம்பெயர்ந்து வாழும் தமிழர்கள் கல்வி, தொழில், வணிகம் மற்றும் சமூகப் பணிகளில் அடைந்துள்ள முன்னேற்றங்களைத் தமிழ் ஆய்வுக்கும் சமூக வளர்ச்சிக்கும் பயன்படுத்துவதற்கான வாய்ப்புகளையும் இம்மாநாடு முன்னிறுத்தியது.
தமிழ்மொழியின் தொன்மையைப் போற்றுவதுடன், அதன் எதிர்கால வளர்ச்சிக்கும் நவீன உலகின் அறிவியல் மற்றும் தொழில்நுட்பச் சூழலில் அதன் நிலையை வலுப்படுத்துவதற்கும் இத்தகைய சர்வதேச மாநாடுகள் அவசியமானவை எனக் கருதப்படுகிறது.
உலகத் தமிழ் ஆய்வு மாநாடு 2026, உலகளாவிய தமிழ்ச் சமூகங்களுக்கிடையிலான அறிவியல் மற்றும் கல்விசார் உறவுகளை வலுப்படுத்துவதற்கான முக்கிய முயற்சியாக அமைந்துள்ளது. தமிழின் பாரம்பரியச் செழுமையையும் எதிர்காலத் தொழில்நுட்ப வாய்ப்புகளையும் இணைத்து, உலகளாவிய தமிழ் ஆய்வுகளுக்கு புதிய வழிகளைத் திறப்பதே இம்மாநாட்டின் முக்கிய நோக்கமாக அமைந்தது.
முதல் நாள்: தொடக்க நிகழ்வும் உலகத் தமிழர் பொருளாதாரமும்
அக்டோபர் 15 – மாநாட்டின் தொடக்க நாள்
கனடாவின் ஸ்கார்பரோவில் அமைந்துள்ள சென்டென்னியல் கல்லூரி நிகழ்வு மையத்தில் மாநாட்டின் முதல் நாள் நிகழ்வுகள் நடைபெற்றன. தொடக்க நிகழ்வில் உலகெங்கும் வாழும் தமிழர்களின் அறிவு, அனுபவம் மற்றும் வளங்களை ஒருங்கிணைத்து, தமிழ்மொழி மற்றும் சமூகத்தின் எதிர்கால வளர்ச்சிக்குப் பயன்படுத்துவதன் அவசியம் வலியுறுத்தப்பட்டது. தொடர்ந்து சிறு மற்றும் நடுத்தரத் தொழில் முயற்சிகள், சமயவியல் மற்றும் மெய்யறிவியல், வரலாற்று மற்றும் செம்மொழி அடித்தளங்கள் தொடர்பான ஆய்வரங்குகள் இடம்பெற்றன. பிற்பகலில் சுற்றுலா அபிவிருத்தி, பொருளாதாரச் சிந்தனையில் புலம்பெயர் தமிழர்களின் பங்கு, நாடுகளைக் கடந்த தமிழர் வாழ்வியல் போன்ற தலைப்புகளில் ஆய்வுகள் முன்வைக்கப்பட்டன. மாலையில் உலகத் தமிழர் பொருளாதாரக் கட்டமைப்பு மற்றும் மூன்றாவது கலாசாரச் சூழலில் வளரும் தமிழர்கள் தொடர்பான சிறப்பு மன்றங்களும் நடைபெற்றன.
செயற்கை நுண்ணறிவும் தமிழர் பண்பாட்டு அடையாளமும்
அக்டோபர் 16 – ஆய்வுகளும் அறிவுப் பரிமாற்றமும்
மாநாட்டின் இரண்டாம் நாள் நிகழ்வுகளில் தமிழ்மொழிக்கும் செயற்கை நுண்ணறிவுக்கும் இடையிலான தொடர்பு முக்கிய இடத்தைப் பெற்றது. தமிழ்மொழியைக் கற்பதற்கான செயற்கை நுண்ணறிவுத் தளங்கள், மொழித் தொழில்நுட்பத்தின் சவால்கள் மற்றும் நவீனக் கற்றல் முறைகள் தொடர்பான ஆய்வுகள் முன்வைக்கப்பட்டன. மரபுரிமை மற்றும் பண்பாடு, மெய்ப்பொருளியல், கல்வி மற்றும் வேலைவாய்ப்பு, பண்பாட்டுத் தொடர்ச்சி, கதையாடல்கள், இலங்கையின் விளிம்புநிலைச் சமூகங்கள், விவசாயம் ஆகிய துறைகளிலும் ஆய்வரங்குகள் நடைபெற்றன. சமூகமொழியியல், அடையாள அரசியல், புலம்பெயர் தமிழர்களின் வாழ்க்கை மற்றும் பொருளாதாரப் பங்களிப்பு போன்ற விடயங்களும் விவாதிக்கப்பட்டன. இந்நிகழ்வுகள், தமிழ்மொழியின் தொன்மையையும் பண்பாட்டு மரபுகளையும் பாதுகாப்பதுடன், மாறிவரும் உலகச் சூழலில் அவற்றைத் தொழில்நுட்பத்தின் ஊடாக அடுத்த தலைமுறைக்குக் கொண்டு செல்வதற்கான வாய்ப்புகளை ஆராய்வதாக அமைந்தன.
மூன்றாம் நாள்: தமிழர் எதிர்காலம், இளையோர் வளர்ச்சி மற்றும் செயற்கை நுண்ணறிவு
அக்டோபர் 17 – எதிர்காலத்தை நோக்கிய ஆய்வுகள்
மாநாட்டின் மூன்றாம் நாள் நிகழ்வுகளில் செயற்கை நுண்ணறிவு, சமூக மற்றும் பண்பாட்டுச் சூழல்கள், தமிழ்நாட்டின் விளிம்புநிலைச் சமூகங்கள், தமிழ்க் கல்வி மற்றும் புலம்பெயர் தமிழர்களின் அடையாளம் ஆகியவை தொடர்பான ஆய்வுகள் இடம்பெற்றன. தமிழ்ப் பெண்களும் செயற்கை நுண்ணறிவும் என்ற தலைப்பிலான சிறப்பு மன்றமும், உலகளாவிய நோக்கில் தமிழிளையோர் அபிவிருத்தி தொடர்பான மன்றமும் நடைபெற்றன. தொடர்ந்து செயற்கை நுண்ணறிவு, நவீன ஆய்வு முறைகள் மற்றும் எதிர்காலத் திசைகள், தமிழ்க் கல்வி, புலம்பெயர் தமிழர்களின் பண்பாட்டு அடையாளம், செய்யறிவின் பயன்பாடுகள் மற்றும் எதிர்கால வளர்ச்சிகள் தொடர்பான அமர்வுகள் இடம்பெற்றன. வடக்கு மற்றும் கிழக்கு இலங்கையின் கல்வி அபிவிருத்தி, தொழில்நுட்பம் சார்ந்த பிராந்தியப் பொருளாதார வளர்ச்சி உள்ளிட்ட விடயங்களும் ஆய்வுப் பரப்பில் இடம்பெற்றன. மாலையில் அனைத்துலகத் தமிழர் பேரவையின் வருடாந்த விருந்து, விருது வழங்கல், முக்கிய உரை மற்றும் இசை நிகழ்ச்சிகள் இடம்பெறுவதற்கான ஏற்பாடுகளும் நிகழ்ச்சி நிரலில் இடம்பெற்றிருந்தன.
செயல் வீரன் நிமால் விநாயகமூர்த்தி
அனைத்துலகத் தமிழர் பேரவையின் தலைவர் நிமல் விநாயகமூர்த்தி தலைமையில் நடைபெற்ற இம்மாநாட்டின் வழிகாட்டுதல் குழுவில், இந்தியாவைச் சேர்ந்த பேராசிரியர் மா. இராசேந்திரன், இலங்கையைச் சேர்ந்த நாடாளுமன்ற உறுப்பினர் குகதாசன் உள்ளிட்டோர் முக்கிய பங்காற்றினர். ஆய்வுக் குழுவின் தலைவராக சென்னைப் பல்கலைக்கழகத்தின் சைவசித்தாந்தத் துறைப் பேராசிரியர் நெல்லூர் ச. சரவணன் செயற்பட்டதுடன், அவுஸ்திரேலியாவைச் சேர்ந்த பேராசிரியர் ஈ.ஏ. செல்வநாதன், கனடாவைச் சேர்ந்த அருட்தந்தை கலாநிதி ஜோசப் சந்திரகாந்தன் உள்ளிட்ட அறிஞர்களும் ஆய்வுக் குழுவில் இடம்பெற்றனர்.
இலங்கை, இந்தியா, கனடா, அவுஸ்திரேலியா, ஐரோப்பிய நாடுகள் உள்ளிட்ட பல்வேறு பகுதிகளைச் சேர்ந்த ஆய்வாளர்கள் தமது ஆய்வுகளைச் சமர்ப்பித்தனர். இவர்களில் இலங்கையைச் சேர்ந்த பேராசிரியர் சின்னத்தம்பி சந்திரசேகரம், பேராசிரியர் பால் ரோஹன், பேராசிரியர் கே. விசாகரூபன், கனடாவைச் சேர்ந்த கலாநிதி ஏ. சண்முகதாஸ், இந்தியாவைச் சேர்ந்த பேராசிரியர் பி. கலிராஜ் உள்ளிட்டோர் குறிப்பிடத்தக்கவர்கள்.
மாநாட்டின் முக்கியத்துவம்
மூன்று நாட்களிலும் இடம்பெற்ற ஆய்வரங்குகள், தமிழ்மொழி மற்றும் பண்பாட்டின் வரலாற்றுச் செழுமையை நவீன அறிவியல், செயற்கை நுண்ணறிவு, கல்வி, பொருளாதாரம் மற்றும் சமூக அபிவிருத்தியுடன் இணைக்கும் முயற்சியை வெளிப்படுத்தின. உலகின் பல்வேறு நாடுகளில் வாழும் தமிழறிஞர்கள், கல்வியாளர்கள் மற்றும் ஆய்வாளர்கள் தமது அறிவையும் அனுபவங்களையும் பகிர்ந்துகொள்வதற்கான சர்வதேசத் தளமாக மாநாடு அமைந்தது. தமிழாய்வை மரபுவழிப் பார்வையுடன் மட்டுப்படுத்தாமல், எதிர்காலத் தலைமுறைகளின் தேவைகளுக்கும் உலகளாவிய அறிவியல் மாற்றங்களுக்கும் ஏற்ற வகையில் விரிவுபடுத்த வேண்டியதன் அவசியத்தையும் இம்மாநாடு எடுத்துக்காட்டியது.
