இங்கிலாந்தின் பல பகுதிகளில் போலோ புயல் (Storm Boelo) காரணமாக மணிக்கு 80 மைல் (80mph) வேகத்தில் பலத்த காற்று வீசி, கனமழையும் பெய்து வருவதால், ஸ்காட்லாந்து, வட அயர்லாந்து மற்றும் வடக்கு இங்கிலாந்தில் ஆம்பர் (Amber) வானிலை எச்சரிக்கைகள் அமலுக்கு வந்துள்ளன.
சனிக்கிழமை இரவு முதல் பலத்த காற்றும் கனமழையும் தீவிரமடைந்துள்ளன.
ஸ்காட்லாந்து மற்றும் இங்கிலாந்திற்கான ஆம்பர் எச்சரிக்கை ஞாயிற்றுக்கிழமை இரவு 09 மணி வரை நீடிக்கும் எனவும், இது போக்குவரத்து பாதிப்பு மற்றும் உயிருக்கு ஆபத்தை ஏற்படுத்தக்கூடும் என்றும் தெரிவிக்கப்பட்டுள்ளது.
‘ஆஸ்டன்’ புயலை (Storm Austen) தொடர்ந்து அடுத்தடுத்த நாட்களில் தாக்கும் இரண்டாவது புயலாக போலோ புயல் வந்துள்ளது. ஆஸ்டன் புயலால் தென்மேற்கு இங்கிலாந்தில் மின்சாரம் துண்டிக்கப்பட்ட 1,24,000க்கும் மேற்பட்ட வீடுகளுக்கு மின் இணைப்பு மீண்டும் வழங்கப்பட்டபோதிலும், நூற்றுக்கணக்கான வீடுகள் சனிக்கிழமை மாலையிலும் மின்சாரமின்றி இருந்தன.
போலோ புயல் காரணமாக வடமேற்கு இங்கிலாந்தில் சனிக்கிழமை இரவு 2,000க்கும் மேற்பட்ட வீடுகளில் மின்சாரம் துண்டிக்கப்பட்டது.
ஸ்காட்லாந்தில் ரயில் மற்றும் படகு (Ferry) சேவைகள் ரத்து செய்யப்பட்டுள்ளன. அத்தியாவசியமற்ற வீதிப் பயணங்களைத் தவிர்க்குமாறு பொலிஸார் எச்சரித்துள்ளனர்.
வெள்ளப்பெருக்கு காரணமாக Greenockஇல் உள்ள A78, Ayrshireஇல் உள்ள A77 மற்றும் Dumfries and Galloway போன்ற இடங்களில் முக்கிய வீதிகள் மூடப்பட்டுள்ளன.
வட அயர்லாந்தின் சில பகுதிகளுக்கு ஞாயிற்றுக்கிழமை காலை 10 மணி வரை ஆம்பர் எச்சரிக்கை விடுக்கப்பட்டுள்ளது. மேலும் இங்கிலாந்தின் பல பகுதிகளுக்கு மஞ்சள் எச்சரிக்கையும் விடுக்கப்பட்டுள்ளது.
அயர்லாந்தின் டப்ளின் விமான நிலையத்தில் பல விமானங்கள் ரத்து செய்யப்பட்டுள்ளன. மேலும் ஐரிஷ் கடலில் செல்லும் முக்கிய படகு சேவைகளும் (StenaLine, Irish Ferries, P&O Ferries) ரத்து செய்யப்பட்டுள்ளன.
