சினிமாவை புரிந்து கொண்டுள்ள நான் இனி எந்த மாதிரியான கதாபாத்திரத்திலும் நடிக்கத் தயார் என்று நடிகை ரெஜினா கஸாண்ட்ரா தெரிவித்துள்ளார்.
கேடி பில்லா கில்லாடி ரங்கா, ராஜதந்திரம், மாநகரம் போன்ற வெற்றிப் படங்களில் கதாநாயகியாக நடித்தவர் ரெஜினா. இவர் “மிஸ்டர் சந்திரமெளலி” படத்திற்கு பிறகு “பார்ட்டி”, “கசட தபற” படங்களில் நடித்து வருகிறார். இவர் தமிழ், தெலுங்கு, இந்தி, கன்னடம் என்று பல மொழிகளில் கதாநாயகியாக நடித்து வருகிறார். 
இவர் தற்போது தமிழ் மற்றும் தெலுங்கு சினிமாவிலும் நல்ல நல்ல கதைகளை தேர்ந்தெடுத்து நடித்து வருகிறார். சமீபத்தில் அவர் அளித்த பேட்டி ஒன்று அவரது ரசிகர்களை குதூகலப் படுத்தியுள்ளது. இவர் நடிப்பில் “எவரு” படம் ரிலீசாகி தெலுங்கு ரசிகர்களிடம் நல்ல வரவேற்பை பெற்று வருகிறது. இவரது நடிப்புத்திறனை பார்த்த சினிமா பிரபலங்கள் கூட இவரை பாராட்டி வருகின்றனர். அதேபோல் இந்த படம் வெளியானதிலிருந்து இன்று வரை நல்ல விமர்சனத்தை பெற்று வருகிறது.
நடிகை ரெஜினா தெலுங்கு திரையுலகிலும் முன்னணி நடிகையாக இருக்கிறார். அவர் அளித்த பேட்டி ஒன்றில், “நான் நடிக்க வந்து ஏழு ஆண்டுகள் ஆகிவிட்டன. ஆரம்பக்கட்டக் காலங்களில் சினிமாவை பற்றி எதுவும் தெரியாமல் தவித்தேன். எந்த மாதிரி கதைகள் மற்றும் கதாபாத்திரங்களில் நடிக்க வேண்டும் என்று புரியாமல் குழம்பினேன். தற்போது சினிமாவில் நிறைய விஷயங்களை கற்றுக்கொண்டு வருகிறேன். அது எனது நிஜ வாழ்க்கையிலும் பயனளிப்பதாக உள்ளது” என்றார். 
மேலும் அவர் கூறியதாவது, “நான் நடிக்கும் ஒவ்வொரு படத்திலும் என்னுடைய கதாபாத்திரத்தைப் பற்றித்தான் ஆராய்ச்சி செய்கிறேன். நான் செய்யும் தவறுகளை திருத்தி வருகிறேன். சில நேரம் நான் செய்தது சரி என்று நினைப்பேன். ஆனால் அது தவறாக முடிந்து விடும்.
விதிமுறைகளை மீற வேண்டியதும் இருக்கும். இப்போது சினிமா என்ன என்பதை நன்றாகவே புரிந்து கொண்டுள்ளேன். கதைக்கு தேவை என்றால் எந்தமாதிரி கதாபாத்திரத்திலும் நடிக்க தயாராக உள்ளேன்.” என்று பேசி பரபரப்பை ஏற்படுத்தியுள்ளார் ரெஜினா.
