எந்தப் பாசறையில் நிசத்தை தேடுவது
நிசம் நிழலின் கீழ் ஒளிந்துள்ளதா
அல்லது நிழலின் ஆடையைக் கழற்றி தன்னை உணர்த்துகிறதா
இரு கைகள் மோதுகையில் சத்தம் வருவது போல்
இருமனது மோதுகையில் யுத்தம் வருகிறது
பிறகு இன்னொன்று பூக்கிறது
பாசறைப் பாடல்களைப் பாடுகையில்
கார்த்திகையை விரித்து வைத்து
தொலையுண்ட தூயத்தின்
தீபக் கதைகளை
பாடச் சொல்கிறது மனம்
மருதாணி தடவிய அழகிய விரல்களில்
துப்பாக்கி சிரிக்கும் பாசறைகள் நமது
பூக்கள் தரித்த அழகிய கூந்தலில்
வேட்கை பூப்பது நமது
மென்மை நெஞ்சின் நரம்புக் கணுக்களில் குப்பி சிரிப்பது நமது
பட்சிகள் மேயும் கானக மரங்களில்
கந்தகம் பூசுவது நமது
இப்படியானவோர் காலத்தின் தெருக்களில்
நம்மைத் தொடரும் நிழல்களில்
நிசங்களைத் தேடுகையில்
வடிந்தோடும் வரலாற்றின் சொட்டுகளைக் கொண்டு
கவி மொட்டவிழ்க்காமல் இருக்க முடியவில்லை
உண்மையில்
நிசமென்பது என்ன
வாழ்ந்தவையா
வாழப்போவனவா
வாழ்ந்து கொண்டிருப்பனவா
த.செல்வா
மாலை 3.36
இரணைமடு
