ஸ்பெயின் கால்பந்து அணி, உலக அரங்கில் மீண்டும் தனது ஆதிக்கத்தை நிரூபித்துள்ளது. அர்ஜென்டினாவை 1-0 என்ற கோல் கணக்கில் வீழ்த்தி, 2026 FIFA உலகக்கோப்பை கால்பந்து தொடரின் சாம்பியன் பட்டத்தை வென்ற ஸ்பெயின், தனது வரலாற்றில் இரண்டாவது முறையாக உலகக்கோப்பையை கைப்பற்றியுள்ளது.
2010ஆம் ஆண்டு உலக சாம்பியனான ஸ்பெயின், 16 ஆண்டுகளுக்குப் பிறகு மீண்டும் உலகக் கால்பந்தின் உச்சியை எட்டியுள்ளது.
நேற்று ஞாயிற்றுக்கிழமை (19) நடைபெற்ற இந்த பரபரப்பான இறுதிப்போட்டி ஆரம்பம் முதல் இறுதி வரை ரசிகர்களை இருக்கையின் நுனியில் அமர வைத்தது. ஐரோப்பிய சாம்பியனான ஸ்பெயினும், தென் அமெரிக்க சாம்பியனான அர்ஜென்டினாவும் மோதிய இந்த போட்டி, FIFA தரவரிசையில் முதல் இரண்டு இடங்களில் இருந்த அணிகளின் நேரடி பலப்பரீட்சையாக அமைந்தது. மேலும், இறுதிப்போட்டி வரை இரு அணிகளும் தோல்வியின்றி முன்னேறியிருந்ததால், உலகம் முழுவதும் இந்த போட்டி பெரும் எதிர்பார்ப்பை ஏற்படுத்தியிருந்தது.
ஆட்டம் தொடங்கிய முதல் நிமிடத்திலிருந்தே ஸ்பெயின் அணி பந்தின் கட்டுப்பாட்டை முழுமையாக தக்கவைத்துக் கொண்டு தொடர்ச்சியான தாக்குதல்களை நடத்தியது. ஐந்தாவது நிமிடத்திலேயே இளம் நட்சத்திரம் லாமின் யமால் அடித்த தாழ்வான ஷாட்டை அர்ஜென்டினாவின் கோல்கீப்பர் எமிலியானோ மார்டினெஸ் அபாரமாக தடுத்து நிறுத்தினார். அதனைத் தொடர்ந்து ஸ்பெயின் வீரர்கள் பல்வேறு கோல் வாய்ப்புகளை உருவாக்கினாலும், மார்டினெஸின் அதிரடியான சேவ்கள் காரணமாக கோல் கணக்கைத் தொடங்க முடியவில்லை.
முதல் பாதி முடிவதற்கு முன்பாக மைக்கேல் ஒயர்சாபல் அடித்த சக்திவாய்ந்த ஷாட்டையும் மார்டினெஸ் தடுத்தார். மற்றொரு வாய்ப்பில் மார்க் குகுரெல்லா அடித்த பந்து கோல் கம்பத்தை விட்டு சற்றே வெளியேறியது. இதனால் முதல் பாதி கோல் ஏதுமின்றி நிறைவடைந்தது.
இரண்டாவது பாதியிலும் ஸ்பெயின் தனது தாக்குதல் ஆட்டத்தை மேலும் தீவிரப்படுத்தியது. 67ஆவது நிமிடத்தில் லாமின் யமால் துல்லியமாக வழங்கிய பந்தை பெரான் டோரஸ் தலையால் கோலாக்க முயன்றபோதும், அதையும் மார்டினெஸ் அசத்தலாக தடுத்தார். பின்னர் பாவ் குபார்சி, பெத்ரி மற்றும் நிகோ வில்லியம்ஸ் ஆகியோரின் தொடர்ச்சியான கோல் முயற்சிகளையும் அவர் முறியடித்தார். வழக்கமான நேரத்தின் இறுதி தருணங்களில் யமால் அடித்த அபாரமான ப்ரீ கிக்கையும் பறந்து சென்று தடுத்த மார்டினெஸ், போட்டியின் மிகச் சிறந்த வீரர்களில் ஒருவராகத் திகழ்ந்தார்.
இந்த போட்டியில் அர்ஜென்டினாவின் பாதுகாப்பு வரிசைக்கு பெரும் பின்னடைவு ஏற்பட்டது. முக்கிய சென்டர்-பேக் வீரர்களான லிசாண்ட்ரோ மார்டினெஸ் மற்றும் கிறிஸ்டியன் ரொமேரோ ஆகியோர் காயம் காரணமாக வெளியேறியதால், அவர்களுக்குப் பதிலாக நிக்கோலாஸ் ஓட்டமெண்டி மற்றும் பேகுண்டோ மெதினா களமிறக்கப்பட்டனர்.
இந்த மாற்றங்கள் அர்ஜென்டினாவின் பாதுகாப்பில் தாக்கத்தை ஏற்படுத்தினாலும், மார்டினெஸின் அபாரமான கோல் காப்பு அந்த அணியை நீண்ட நேரம் போட்டிக்குள் வைத்திருந்தது.
மறுபுறம், இந்த உலகக்கோப்பை தொடரில் இறுதிப்போட்டி வரை 19 கோல்களை அடித்திருந்த அர்ஜென்டினா, ஸ்பெயினின் இரும்பு போன்ற பாதுகாப்பு அமைப்பை உடைக்க முடியாமல் திணறியது. கூடுதல் நேரம் வரை இலக்கை நோக்கி ஒரு ஷாட் கூட பதிவு செய்ய முடியாத அளவுக்கு ஸ்பெயின் பாதுகாப்பு அர்ஜென்டினாவின் தாக்குதலை முற்றிலும் கட்டுப்படுத்தியது.
போட்டியின் 93ஆவது நிமிடத்தில் பாவ் குபார்சியை தவறாக தடுத்த என்ஸோ பெர்னாண்டஸ் இரண்டாவது மஞ்சள் அட்டையைப் பெற்று சிவப்பு அட்டையுடன் வெளியேறினார். இதனால் அர்ஜென்டினா அணி கூடுதல் நேரத்தில் 10 வீரர்களுடன் மட்டுமே விளையாட வேண்டிய கட்டாயம் ஏற்பட்டது.
கூடுதல் நேரத்திலும் ஸ்பெயின் தொடர்ந்து தாக்குதல் நடத்திக் கொண்டே இருந்தது. நிகோ வில்லியம்ஸ் மற்றும் பெரான் டோரஸ் அடித்த இரண்டு கோல்கள் ஆஃப்சைடு காரணமாக மறுக்கப்பட்டதால் போட்டி மேலும் விறுவிறுப்பானது.
இறுதியாக 106ஆவது நிமிடத்தில் போட்டியின் தலைவிதியை மாற்றிய தருணம் வந்தது. பெட்ரோ போரோ வலதுபுறத்தில் இருந்து துல்லியமாக அனுப்பிய கிராஸ் பந்தை நிகோ வில்லியம்ஸ் தலையால் பெரான் டோரஸுக்கு திசைதிருப்பினார். எந்தவித தயக்கமும் இன்றி முதல் ஷாட்டிலேயே டோரஸ் அந்த வாய்ப்பை கோலாக மாற்றினார். அந்த ஒரே கோல் ஸ்பெயின் அணிக்கு உலக சாம்பியன் பட்டத்தை உறுதி செய்தது.
இறுதி வரை போராடிய அர்ஜென்டினாவால் பதிலடி கொடுக்க முடியவில்லை. இதன் மூலம் 2010 உலகக்கோப்பை இறுதிப்போட்டியைப் போலவே, இந்த முறையும் கூடுதல் நேரத்தில் வெற்றியைப் பதிவு செய்த ஸ்பெயின், உலகக் கால்பந்தின் சிம்மாசனத்தில் மீண்டும் அமர்ந்தது.
இந்த வெற்றி ஸ்பெயின் கால்பந்து வரலாற்றில் மறக்க முடியாத மைல்கல்லாக அமைந்ததுடன், புதிய தலைமுறை வீரர்களின் திறமையையும் உலக அரங்கில் மீண்டும் உறுதிப்படுத்தியுள்ளது. அதேவேளை, 11 அபாரமான சேவ்களை நிகழ்த்தி இறுதி வரை அணியை காப்பாற்றிய எமிலியானோ மார்டினெஸின் போராட்டமும் ரசிகர்களின் பாராட்டைப் பெற்றுள்ளது.
