மியான்மரில் கடந்த 10 மாதங்களில் 177 பேர் மனித கடத்தலினால் பாதிக்கப்பட்டுள்ளதாக அந்நாட்டின் அரசு ஊடகமான குளோபல் நியூ லைட் தெரிவித்துள்ளது.
மியான்மர் மனித கடத்தல் தடுப்பு காவல்துறையின் தகவலாக குறிப்பிடப்பட்டுள்ள செய்தியில், இதே காலக்கட்டத்தில் கடத்தல் வழக்கில் தொடர்புடைய 502 சந்தேக நபர்கள் கைது செய்யப்பட்டுள்ளதாக சுட்டிக்காட்டப்பட்டுள்ளது. மனித கடத்தல் சம்பவங்களில் பாதிக்கப்பட்ட 277 பேரும் மீட்கப்பட்டுள்ளனர்.
அத்துடன், 136 கட்டாய திருமணங்களை காவல்துறை தடுத்துள்ளது. பாலியல் தொழிலுக்குள் தள்ளப்பட்ட 24 வழக்குகள், 11 உழைப்பு சுரண்டல் வழக்குகள், 3 வாடகைத்தாய் வழக்குகள் மற்றும் குழந்தை ஒன்று விற்கப்பட்ட வழக்கையும் மனித கடத்தல் தடுப்பு காவல்துறை கையாண்டுள்ளதாக கூறப்பட்டுள்ளது.
மனித கடத்தலில் சிக்கிய பெரும்பாலான மக்கள் அண்டைய நாடுகளான சீனா மற்றும் தாய்லாந்தில் விற்கப்படும் நிலை இன்றும் நிலவி வருகின்றது. இவ்வாறான மனித கடத்தல் நிகழ்வுகள் மியான்மரின் ஷான் மாநிலத்தில் அதிகமாக பதிவாகியுள்ளது. இம்மாநிலம் சீனா, லாவோஸ், தாய்லாந்து உள்ளிட்ட மூன்று நாடுகளுடன் எல்லைகளை கொண்டிருக்கின்றது.
2005ல் மியான்மரில் கொண்டுவரப்பட்ட மனித கடத்தல் தடுப்பு சட்டத்தின் கீழ், பெண்கள் மற்றும் குழந்தைகள் கடத்தலில் ஈடுபடுபவர்களுக்கு குறைந்தபட்சம் 10 ஆண்டுகள் தண்டனை அல்லது ஆயுள் தண்டனை அல்லது அபராதம் விதிக்கப்படும். இவ்வாறான கடத்தல் மூலம் ஈட்டிய பணத்தை அல்லது சொத்தை மியான்மர் அரசு பறிமுதல் செய்வதற்கும் இச்சட்டம் அனுமதிக்கின்றது.
உழைப்பு சுரண்டல் மற்றும் பாலியல் சந்தைக்கு அடித்தளமாக இருக்கும் மனித கடத்தலில் தென்கிழக்காசிய நாடுகள் இன்றளவிலும் பிரதான மையமாக செயல்பட்டு வருகின்றது. மனிதகடத்தல் நிலையை சுட்டிக்காட்டும் அமெரிக்க அரசு அறிக்கையில், மிக மோசமான கடத்தல் நடக்கும் நாடாக மியான்மர் வரிசைப்படுத்தப்பட்டுள்ளது. ரோஹிங்கியா அகதிகளின் வெளியேற்றமும் இதற்கு காரணமாக பார்க்கப்படுகின்றது.
கோப்பு படம்: ரோஹிங்கியா அகதிகள்
படம் உதவி: AFP /Christophe Archambault
Report by,
Migration Correspondent,
Altamira World Wide
