தமிழகம், கேரளா உள்ளிட்ட 5 மாநிலங்களுக்கான சட்டப்பேரவைத் தேர்தலில் போட்டியிடும் முதற்கட்ட வேட்பாளர் பட்டியலை பா.ஜ.க அரசு இந்த வாரம் வெளியிடவுள்ளதாக தகவல் வெளியாகியுள்ளது.
பாஜகவின் மத்திய தேர்தல் குழுக் கூட்டம் வரும் 4-ம் திகதி தேசியத்தலைவர் ஜே.பி. நட்டா தலைமையில் நடைபெறவுள்ளது. இந்தக் கூட்டத்தின் முடிவில் முதல் கட்ட வேட்பாளர்கள் பட்டியல் வெளியாகும் என பாஜக வட்டாரங்கள் தெரிவிக்கின்றன.
தமிழகம், புதுச்சேரி, கேரளா, அசாம் மற்றும் மேற்கு வங்கம் ஆகிய 5 மாநிலங்களுக்கும் சட்டப்பேரவைத் தேர்தல் நடத்துவது குறித்து கடந்த வாரம் தேர்தல் ஆணையம் அறிவிப்பு வெளியிட்டது.
குறித்த மாநிலங்களுக்கு ஒரே கட்டமாக ஏப்ரல் 6-ம் திகதி தேர்தல் நடைபெறுகிறது. அசாம் மாநிலத்தில் 3 கட்டங்களாகவும், மேற்கு வங்க மாநிலத்தில் 8 கட்டங்களாகவும் தேர்தல் நடத்தப்படவுள்ளது.
இதில் தமிழகத்தில் நடக்கும் தேர்தலில் ஆளும் அதிமுகவுடன் கூட்டணி அமைத்து பாஜக போட்டியிடுகிறது. மேற்குவங்கத்திலும் அசாமிலும் பாஜக தலைமையில் தேசிய ஜனநாயகக்கூட்டணி போட்டியிடுகிறது. கேரளாவில் பாஜக தனித்துப் போட்டியிடுகிறது.
இதையடுத்து இந்த 5 மாநிலங்களில் போட்டியிடும் வேட்பாளர்களுக்கான முதல்கட்டப் பட்டியலை இந்த வாரத்தில் பாஜக தலைமை வெளியிடும் என தகவல்கள் வெளியாகியுள்ளன.
