இங்கிலாந்து மருத்துவமனைகளில் இந்தியா, பிலிப்பைன்ஸ், ஜப்பான் மற்றும் உலக நாடுகளைச் சேர்ந்த 30 ஆயிரத்துக்கும் அதிகமான நர்சுகள் பணிபுரிந்து வருகின்றனர். இந்த நிலையில் இங்கிலாந்து அரசு அந்நாட்டில் நர்சுகள் தங்கி பணியாற்றுவதற்கு புதிய குடியுரிமை கொள்கை ஒன்றை கடந்த 2011-ம் ஆண்டு அறிவித்தது. அதன்படி ஆண்டுக்கு குறைந்தபட்சம் 35 ஆயிரம் பவுண்டுகள் (இந்திய மதிப்பில் சுமார் ரூ.35 லட்சம்) சம்பளம் பெறும் நர்சுகள் மட்டுமே அடுத்த 6 ஆண்டுகளுக்கு பிறகும் அங்கு தொடர்ந்து பணியாற்ற முடியும்.
இந்த சம்பளம் பெற முடியாத வெளிநாட்டு நர்சுகளில் முதல் கட்டமாக 2017-ல் 3,400 பேரும், இரண்டாம் கட்டமாக 2020-ல் 3,600 பேரும் இங்கிலாந்தில் இருந்து வெளியேற்றப்படுகிறார்கள்.
தற்போது மூத்த இந்திய நர்சுகள் சிலரைத் தவிர, மற்றவர்கள் ஆண்டுக்கு 21 லட்ச ரூபாய் வரை தான் சம்பளம் பெற்று வருகின்றனர். இவர்களால் அடுத்த 2 மற்றும் 6 ஆண்டுகளுக்குள் இங்கிலாந்து அரசு அறிவித்துள்ள குறைந்தபட்ச ஆண்டு வருமானத் தொகையான ரூ.35 லட்சத்தை எட்டுவது கடினம். இதன் காரணமாக இங்கிலாந்து மருத்துவமனைகளில் பணிபுரிய சென்ற இளம் இந்திய நர்சுகளில் 2,500 பேர் வரை நாடு திரும்பும் அபாயம் ஏற்பட்டு உள்ளது.
