ஈராக் மற்றும் சிரியாவின் சில பகுதிகளை தனது கட்டுப்பாட்டுக்குள் வைத்துள்ள ஐ.எஸ். தீவிரவாதிகளுக்கு எதிராக அமெரிக்கா தலைமையிலான கூட்டுப்படைகள் தாக்குதல்களை அரங்கேற்றி வருகின்றன. கடந்த சில வாரங்களாக அமெரிக்க படைகளின் வான் தாக்குதல் அதிகரிக்கப்பட்டு உள்ளது.
இதில் கடந்த 5-ந் தேதி மட்டும் சிரியா மற்றும் ஈராக்கில் 21 முறை வான்தாக்குதல்கள் நடந்தது. குறிப்பாக ஈராக்கின் பலுஜா பகுதியில் அமைந்துள்ள ஐ.எஸ். தீவிரவாதிகளின் தளங்கள் மீது 5 முறை தாக்குதல் நடந்தது. இதில் ஒரு கட்டிடம் மற்றும் ஒரு பதுங்கு குழி என பல பகுதிகள் சேதமடைந்தன.
பின்னர் ஈராக்கின் மேலும் 6 நகரங்களில் 12 முறை தாக்குதல் நடத்தப்பட்டது. இதில் தீவிரவாதிகளின் தாக்குதல் நிலைகள், ஆயுதங்கள் உள்ளிட்ட ஏராளமான வளங்கள் அழிக்கப்பட்டன. இதைப்போல சிரியாவில் உள்ள தீவிரவாத நிலைகள் மீதும் 4 முறை தாக்குதல் நடந்தது. இதிலும் கணிசமான பகுதிகள் சேதமடைந்தன.
இதற்கிடையே ஐ.எஸ். தீவிரவாதிகளுக்கு எதிராக ஈராக்கும் முதல் முறையாக வான்தாக்குதலை நடத்தியுள்ளது. அமெரிக்காவில் இருந்து வாங்கப்பட்ட எப்-16 ரக தாக்குதல் விமானங்கள் மூலம், தலைநகர் பாக்தாத் அருகே உள்ள அன்பர் மாகாணத்தில் உள்ள தீவிரவாத நிலைகள் மீது இந்த தாக்குதல் நடத்தப்பட்டதாக அமெரிக்கா கூறியுள்ளது.
