நேபாளம், சீனா, இந்தோனேசியா, மங்கோலியா, மியான்மர், தாய்லாந்து, பிலிப்பைன்ஸ் மற்றும் வியாட்நாம் உள்ளிட்ட நாடுகளைச் சேர்ந்த தொழிலாளர்களை பணியில் அமர்த்த ஜப்பான் அரசு ஒப்புதல் வழங்கியுள்ளது.
இது குறித்த ஆலோசனைகள் நீண்ட காலங்களாக நடந்து வந்த நிலையில், இதற்கான ஒப்புதலை கடந்த டிசம்பர் 26ம் தேதி அன்று ஜப்பான் அமைச்சரவை வழங்கியிருக்கின்றது. இந்த ஒப்புதலைத் தொடர்ந்து, வரும் ஏப்ரல் 2019 முதல் ஜப்பான் நிறுவனங்கள் மேற்கூறப்பட்ட நாடுகளிலிருந்து உடல் உழைப்புத் தொழிலாளர்களை பணியில் அமர்த்திக் கொள்வதற்கான அனுமதி கொடுக்கப்பட்டிருக்கின்றது.
தொழிலாளர்கள் தொடர்பான ஒப்பந்தம் இதுவரை கையெழுத்திடப்படவில்லை என்றாலும் ஜப்பான் அரசின் இம்முடிவு ஒரு நல்ல செய்தி என நேபாள் தொழிலாளர், வேலைவாய்ப்பு மற்றும் சமூகப் பாதுகாப்பு அமைச்சகத்தின் செயலாளர் மகேஷ் பிரஷாத் டஹால் தெரிவித்திருக்கிறார்.
சம்பளம் மற்றும் பணிப்பலன்கள் தொடர்பாக வரும் நாட்களில் ஜப்பான் அரசுடன் விவாதிக்கப்படும் என அவர் கூறியுள்ளார். ஜப்பான் அரசின் முடிவுப்படி, முதல் ஐந்து ஆண்டுகளில் 345,000 மேற்பட்ட வெளிநாட்டுத் தொழிலாளர்கள் நர்சிங், உற்பத்தி, கட்டிட பராமரிப்பு, விவசாயம், ஹோட்டல் துறை, மீன்பிடி உள்ளிட்ட 14 துறைகளில் பணியாற்ற அனுமதிக்கப்படுவார்கள்.
இந்த நாடுகளிலிருந்து வரக்கூடிய தொழிலாளர்கள் முதல் ஐந்து ஆண்டுகளுக்கு குடும்பத்தை அழைத்து வர அனுமதியில்லை என்றும் சுட்டிக்காட்டப்பட்டுள்ளது. இதே போல் வெளிநாட்டினர் இடையே ஜப்பானிய மொழியை பயிற்றுவிக்கும் திட்டத்துக்கு 600 மில்லியன் யென் (1 யென் =0.64 இந்திய ரூபாய்) ஒதுக்கப்பட்டுள்ளது.
