1
காற்றுக்கும் மொழி உண்டு
கடலுக்கும் மொழி உண்டு
காலையில் தினம் பாடும்
பறவைக்கும் மொழி உண்டு
மலை கூடி மொழி பேசும்
மௌனமாய் கவி பாடும்
அழகான நதி வந்து
அதனோடு கதை பேசும்
அமுதான தமிழ் போல
அந்த குருவிக்கும் மொழி உண்டு
மலர் கூட மொழி பேசும்
மனதோடு இசை பாடும்
அழகான கிளி எல்லாம்
அமுதமாய் தமிழ் பேசும்
அருகோடு குயில் வந்து
அதனோடு சுரம் பாடும்
மழை கூடி தினம் வந்து
மலரோடு கதை பேசும்
இரவோடு இது பேசும்
மொழி எல்லாம் தனி ராகம்
சிற்பியின் உளியோடு
சிலை கூட மொழி பேசும்
அவனோடு தனியாக
அது பேசும் மொழி வேறு
அழகான பாவங்கள்
அசைந்து ஆடும் ராகங்கள்
மனதோடு அது பேசும்
மனிதர்க்கு மட்டும் தான்
மொழி என்று எவன் சொன்னான்
இயற்கையின் மொழி எல்லாம்
இறைவனின் படைப்பாகும்
இது பேசும் மொழி எல்லாம்
இதயத்தின் கனவாகும் .
