வெல்லவாய – எல்ல பிரதான வீதியில் அம்வத்த பகுதியில் இன்று இடம்பெற்ற விபத்தில் இராணுவச் சிப்பாய் ஒருவர் உயிரிழந்துள்ளார். மற்றொருவர் படுகாயமடைந்துள்ளார்.
வீதியில் பயணித்துக்கொண்டிருந்த மோட்டார் சைக்கிளுடன் வீதியைக் கடக்க முயன்ற நாய் ஒன்று, மோதியதில் இந்த விபத்து இடம்பெற்றுள்ளது.
விபத்தின் போது மோட்டார் சைக்கிளில் இராணுவத்தினர் இருவர் பயணித்துள்ளதுடன் அவர்களில் ஒருவர் உயிரிழந்துள்ளார்.
உயிரிழந்தவர் தம்பகல்ல பிரதேசத்தில் வசித்து வந்த, 41 வயதுடைய இராணுவ சார்ஜன்ட் ஆவார்.
விபத்தில் படுகாயமடைந்த மற்றைய இராணுவச் சிப்பாய் வெல்லவாய ஆதார வைத்தியசாலையில் சேர்க்கப்பட்டு, மேலதிக சிகிச்சைக்காக பின்னர் மொனராகலை மாவட்ட பொது வைத்தியசாலைக்கு மாற்றப்பட்டார்.
விபத்து தொடர்பான மேலதிக விசாரணைகளை வெல்லவாய பொலிஸ் நிலைய அதிகாரிகள் மேற்கொண்டு வருகின்றனர்.
இதேவேளை, இந்தச் சம்பவம் அருகில் உள்ள வர்த்தக நிலையம் ஒன்றில் பொருத்தப்பட்டிருந்த சி.சி.ரி.வி. கமராவில் பதிவாகியுள்ளது.
