‘கட்டப்பா’ எனும் கதாபாத்திரத்தின் மூலம் அகில இந்திய அளவில் சிறந்த குணசித்திர நடிகர் என்ற உயர்ந்த அடையாளத்தை பெற்றிருக்கும் நடிகர் சத்யராஜ், ‘அங்காரகன்’ எனும் புதிய திரைப்படத்தில் மீண்டும் காவல்துறை அதிகாரியாக நடித்திருக்கிறார் என பட குழுவினர் தெரிவித்திருக்கிறார்கள்.
அறிமுக இயக்குநர் மோகன் டச்சு இயக்கத்தில் தயாராகி இருக்கும் முதல் திரைப்படம் ‘அங்காரகன்’. இதில் நடிகர் ஸ்ரீபதி கதையின் நாயகனாக நடித்திருக்கிறார்.
இவருடன் மலையாள நடிகை நியா, ‘அங்காடித்தெரு’ மகேஷ், ரெய்னா காரத், ரோஷன், அப்புக்குட்டி, தியா, நேகா ரோஸ், குரு சந்திரன் உள்ளிட்ட பலர் நடித்திருக்கிறார்கள்.
கருந்தேள் ராஜேஷ் வசனம் எழுதி இருக்கும் இந்த படத்திற்கு, கிரியேட்டிவ் இயக்குநராக நாயகன் ஸ்ரீபதி பணியாற்றி இருக்கிறார்.
மோகன் டச்சு ஒளிப்பதிவு செய்திருக்கும் இந்த திரைப்படத்திற்கு கு. கார்த்திக் இசையமைக்கிறார். தமிழ் திரையுலகில் பாடலாசிரியராக பிரபலமான இவர், இந்த படத்தின் மூலம் இசைறமைப்பாளராக அறிமுகமாகிறார்.
சஸ்பென்ஸ் திரில்லர் ஜேனரில் தயாராகி இருக்கும் இந்த திரைப்படத்தை ஜூலியன் & ஜெரோமா இன்டர்நேஷனல் நிறுவனம் சார்பில் தயாரிப்பாளர்கள் ஜோமோன் பிலிப் மற்றும் ஜீனா ஜோமோன் ஆகியோர் தயாரித்திருக்கிறார்கள்.
இப்படத்தின் படப்பிடிப்பு நிறைவடைந்து இறுதி கட்ட பணிகள் விறுவிறுப்பாக நடைபெற்று வருகிறது. விரைவில் இப்படத்தின் ஃபர்ஸ்ட் லுக், சிங்கிள் ட்ராக், டீசர், முன்னோட்டம் ஆகியவை வெளியாகும் என எதிர்பார்க்கப்படுகிறது.
இந்நிலையில் இந்த திரைப்படம் அடுத்த ஆண்டு கோடை விடுமுறையில் வெளியாகும் என படக்குழுவினர் தெரிவித்திருக்கிறார்கள்.
‘லவ் டுடே’ படத்தின் வெற்றிக்குப் பிறகு நடிகர் சத்யராஜ் முக்கிய வேடத்தில் நடித்திருப்பதால், ‘அங்காரகன்’ படத்திற்கு திரையுலக வணிகர்களிடையே பெரும் எதிர்பார்ப்பு ஏற்பட்டிருக்கிறது.
