இங்கிலாந்தின் பல பகுதிகளில் எதிர்வரும் நாட்களில் அடர்ந்த பனிமூட்டம் ஏற்படக்கூடும் என எதிர்வுகூறப்பட்டுள்ள நிலையில், குறிப்பாக நாளை வியாழக்கிழமை (29) காலை வேலைக்குச் செல்லும் நேரத்தில் வாகனப் போக்குவரத்துக்கு சிரமங்கள் ஏற்படக்கூடும் என எச்சரிக்கப்பட்டுள்ளது.
அண்மையில் இங்கிலாந்து முழுவதும் நிலவிய புயல் மற்றும் பலத்த காற்றுடனான வானிலை படிப்படியாகத் தணிந்து வருவதுடன், அடுத்த சில நாட்களில் அமைதியான வானிலை நிலவக்கூடும் என எதிர்பார்க்கப்படுகிறது.
எனினும், காற்றின் வேகம் குறைவடைவதால் இரவு மற்றும் அதிகாலை நேரங்களில் பனிமூட்டம் அதிகரிக்கக்கூடிய சூழ்நிலை உருவாகவுள்ளதாக வானிலை முன்னறிவிப்புகள் தெரிவிக்கின்றன.
இன்று புதன்கிழமை (28) இங்கிலாந்தின் பெரும்பாலான பகுதிகளில் மேகமூட்டத்துடன் கூடிய வானிலை நிலவக்கூடும். சில இடங்களில் வெயில் காணப்பட்டாலும், ஸ்கொட்லாந்தின் தெற்குப் பகுதிகள், இங்கிலாந்தின் வடக்குப் பகுதிகள் மற்றும் வடக்கு வேல்ஸ் ஆகிய இடங்களில் மழை பெய்யக்கூடும் என எதிர்வுகூறப்பட்டுள்ளது.
இந்த மழை காலை நேரத்தில் வேல்ஸின் தென்கிழக்குப் பகுதிகளையும் இங்கிலாந்தின் மிட்லண்ட்ஸ் பகுதிகளையும் நோக்கி நகர்ந்து பின்னர் படிப்படியாகக் குறைவடையக்கூடும்.
பிற்பகலில் இங்கிலாந்தின் பெரும்பாலான பகுதிகளில் மழையற்ற காலநிலையுடன் இடையிடையே வெயில் காணப்படலாம்.
பகல் நேர வெப்பநிலை பொதுவாக 12 முதல் 16 பாகை செல்சியஸ் வரை பதிவாகக்கூடும் என எதிர்பார்க்கப்படுகிறது.
இதற்கிடையில், புதன்கிழமை இரவு முதல் வியாழக்கிழமை அதிகாலை வரையான காலப்பகுதியில் காற்றின் வேகம் குறைவடைவதுடன், கிழக்கு வேல்ஸ் மற்றும் மத்திய, தெற்கு இங்கிலாந்தின் பல பகுதிகளில் பனிமூட்டம் உருவாகக்கூடும்.
சில இடங்களில் பனிமூட்டம் மிகவும் அடர்த்தியாகக் காணப்படலாம் என்பதால், வீதிகளில் முன்னால் செல்லும் வாகனங்களையும் ஏனைய தடைகளையும் தெளிவாகக் காண்பதில் சிரமங்கள் ஏற்படக்கூடும்.
குறிப்பாக நாளை வியாழக்கிழமை காலை அலுவலகங்கள் மற்றும் பாடசாலைகளுக்குச் செல்லும் நேரத்தில் வாகன சாரதிகள் கூடுதல் அவதானத்துடன் செயற்பட வேண்டிய நிலை ஏற்படலாம்.
சில பகுதிகளில் பனிமூட்டம் நண்பகல் வரை நீடிக்கக்கூடும் எனவும் வானிலை முன்னறிவிப்புகள் குறிப்பிடுகின்றன.
வெள்ளிக்கிழமை மற்றும் சனிக்கிழமைகளில் ஸ்கொட்லாந்து, வட அயர்லாந்து மற்றும் இங்கிலாந்து, வேல்ஸ் ஆகியவற்றின் வடக்குப் பகுதிகளில் மீண்டும் மழை பெய்யக்கூடும்.
அதேவேளை, கிழக்கு மற்றும் தெற்கு இங்கிலாந்தின் சில பகுதிகளில் மீண்டும் பனிமூட்டம் உருவாகும் வாய்ப்புள்ளதாகத் தெரிவிக்கப்பட்டுள்ளது.
