தமிழ் மருத்துவ முன்னோடி கிறீனின் அடிச்சுவட்டை தேடிச்சென்றவர்.
முருகபூபதி
இலங்கையில் வடபுலத்தில் நாவற்குழியில் 1929 ஆம் ஆண்டு பிறந்த இராமலிங்கம் அம்பிகைபாகர்தான் பின்னாளில் கவிஞர் அம்பி என அறியப்பட்டார்.
இவர் தற்போது அவுஸ்திரேலியாவில் சிட்னியில் வசிக்கிறார்.
கவிஞர் அம்பி அவர்கள் இலங்கையில் வடபுலத்தில் நாவற்குழியில் 17-02-1929 ஆம் திகதி பிறந்தார். தனது ஆரம்பக்கல்வியை நாவற்குழி சி.எம்.எஸ் பாடசாலையிலும் பின்னர் உயர் கல்வியை யாழ். பரியோவான் கல்லூரியிலும் தொடர்ந்த அவர், விஞ்ஞான மற்றும் கணித ஆசிரியராக இலங்கையில் பல பாகங்களிலும் பணியாற்றினார். கொழும்பு கல்வி வெளியீட்டுத்திணைக்களத்தில் தமிழ் பாடநூல் ஆசிரியராகவும் பணியாற்றிய அம்பி, 1981 இல் பாப்புவா நியூகினி நாட்டிற்கு பணிநிமித்தம் சென்று அதன்பின்னர் 1992 ஆம் ஆண்டில் அவுஸ்திரேலியாவுக்கு புலம்பெயர்ந்தார்.
இளம் பராயத்திலிருந்தே கவிதை, கவிதை நாடகம், சிறுகதை, கட்டுரை, விமர்சனம். ஆய்வு முதலான துறைகளில் அவர் அளப்பரிய பணிகளை மேற்கொண்டிருந்தபோதிலும் தமிழ்கூறும் நல்லுலகில் கவிஞர் என்றே அறியப்பட்டவர்.
ஏறினால் கட்டில் இறங்கினால் சக்கர நாற்காலி. இதுவே அவரது பல வருட வாழ்க்கையாகிப்போனாலும், இந்த முதிய வயதிலும் சமகால மெய்நிகர் அரங்குகளில் தோன்றி கருத்துரைக்கிறார்.
அம்பி எமது அவுஸ்திரேலியத் தமிழ் இலக்கிய கலைச் சங்கத்தின் ஸ்தாபக உறுப்பினர். அத்துடன் சமகாலத்தில் இச்சங்கத்தின் மதிப்பார்ந்த காப்பாளர்.
அம்பிக்கு 2004ஆம் ஆண்டு 75 வயது பிறந்தபொழுது அதனை பவளவிழாவாக நாம் கன்பரா மாநிலத்தில் கொண்டாடினோம்.
அவருக்கு 90 வயது பிறந்ததும் சிட்னியில் கலை, இலக்கிய அன்பர்கள் இணைந்து 2019 இல் பெருவிழா எடுத்தனர்.
குழந்தை இலக்கிய வளர்ச்சிக்கும் வளம் சேர்த்துள்ள அம்பியின் குழந்தைகளுக்கான கொஞ்சும் தமிழ் நூல் குறிப்பிடத்தகுந்தது.
குழந்தைகளை நாம் என்றென்றும் கொஞ்சிக் கொஞ்சித்தான்வளர்க்கின்றோம்.
” உலகில் நல்லவைகள் யாவும் குழந்தைகளுக்கே” என்று பல்லாண்டு காலத்திற்கு முன்னரே சோவியத் ரூஷ்யாவின் சிற்பி மேதை லெனின் தெரிவித்தார்.
எழுதுவதற்கு மிகவும் சிரமமான இலக்கியம் எதுவென்று கேட்டால், குழந்தை இலக்கியம்தான் படைப்பதற்கு சிரமமானது எனச்சொல்வார்கள். அதில் உண்மை இருக்கிறது.
குழந்தைகளின் உளவியலைப்புரிந்துகொண்டால்தான் அது சாத்தியம்.
குழந்தை இலக்கியங்களை ஊக்குவித்து வளர்ப்பதற்காக யுனெஸ்கோ முதற்கொண்டு பல உலக அமைப்புகள் அன்று முதல் தீவிரமாக இயங்கிவருகின்றன.
கவிஞர் அம்பி, தமது ஆசிரியப்பணி காலத்திலேயே குழந்தை இலக்கியம் படைத்தவர். கொழும்பில் கல்வி வெளியீட்டுத்திணைக்களத்தில் பாட நூலாசிரியராகவும் பணியாற்றியவர். அவருக்கிருந்த அனுபவத் தேர்ச்சியினால் சிட்னியில் தமிழ்ப்பாட நூல்கள் தயாரிக்கும் குழுவிலும் அங்கம்வகித்தார்.
எமது தமிழ்க் குழந்தைகளுக்காக அரைநூற்றாண்டுக்கு வருமுன்னர் மெல்பனில் மாவை நித்தியானந்தன் பாரதி பள்ளியை தொடக்கியபொழுது அங்கு வந்து அதனை முறைப்படி ஆரம்பித்துவைத்தவரும் அம்பிதான். அனைவராலும் நேசிக்கப்படும் அன்பர் என்பதனால் அன்புக்கோர் அம்பி என்றும் நாம் அவரை வர்ணிப்போம்.
அம்பி அவர்களை ஈழத்தின் தேசிகவிநாயகம் பிள்ளை என்று தமிழ்நாட்டில் முன்னர் வெளியான கோமல் சாமிநாதனின் சுபமங்களா இதழ் வர்ணித்திருக்கிறது.
கவிஞர் அம்பி எழுதிய கவிதைக்கு சென்னையில் நடந்த உலகத்தமிழராய்ச்சி மாநாட்டில் தங்கப்பதக்கமும் கிடைத்துள்ளது. அதனை வழங்கியவர் மக்கள் திலகம் எம். ஜி.ஆர்.
இன்றும் மானிப்பாயில் விளங்கும் கிறீன் மருத்துவமனையை ஸ்தாபித்த,அமெரிக்க மருத்துவ பாதிரியார் டொக்டர் கிறீன் பற்றிய ஆராய்ச்சி நூலை எழுதியமைக்காக இலங்கையில் அமெரிக்கத்தூதரகத்தால் பாராட்டி கொளரவிக்கப்பட்டவர் அம்பி. இலங்கை அரசு கிறீன் நினைவு அஞ்சல் தலை வெளியிடவும் காரணமாக விளங்கியவர்.
பன்னூலாசிரியர் அம்பியின் யாழ் பாடி கவிதை நாடகத்தை அண்ணாவியார் இளையபத்மநாதன் கூத்தாக
அரங்காற்றுகை செய்துள்ளார். அத்துடன் அம்பியின் நள – தமயந்தி நாட்டிய நாடகத்தை நடன நர்த்தகி கார்த்திகா கணேசர் கொழும்பில் அரங்கேற்றியுள்ளார்.
மகாகவிபாரதி எழுதிய பல குழந்தை இலக்கியப்பாடல்கள் இன்றும் எமக்கு உவகையூட்டுகின்றன. அவற்றில் இடம்பெறும் எளிமையான வார்த்தைக்கோவைகள்தான் அதற்கு முக்கிய காரணம்.
அதுபோன்று கவிஞர் அம்பியும் எமது குழந்தைகளுக்காக எளியசொற்களையே பயன்படுத்தினார்.
கொஞ்சும் தமிழின் அழகும் அச்சிடப்பட்டிருக்கும் நேர்த்தியும் குறிப்பிடத்தகுந்தது.
கண்ணைக்கவர்தல், கருத்தை கவர்தல், மனதில் பதிதல், அதனால் நினைவில் நிற்றல் முதலான அம்சங்கள்தான் குழந்தை இலக்கியத்தின் சிறப்பு.
கொஞ்சும் தமிழ் – தமிழ்நாட்டில் மித்ர பதிப்பகத்தினால் அழகாக அச்சிடப்பட்டிருக்கிறது. தமிழகத்தின் ஓவியர்களை மித்ர பதிப்பகத்தின் எஸ்.பொ. தக்கமுறையில் இந்நூலுக்காக பயன்படுத்தியுள்ளார்.
அம்பி, இந்த முதிய வயதிலும் எழுதி முடித்த தொடர் : சொல்லாத கதைகள். விரைவில் மின்னூலாக வெளிவரவிருக்கிறது.
இன்று தனது 93 ஆவது பிறந்த தினத்தை கொண்டாடும் அம்பி அவர்களை நாமும் கொண்டாடுகின்றோம்.
—0—
