ஞாயிறு போற்றுதும் | என். சண்முகலிங்கன்

25

 

இன்றைய காலையில்
வானிலே மீண்டும் சூரியன்
கைகளைக் கூப்பி
’ஞாயிறு போற்றுதும்…
ஞாயிறு போற்றுதும்…’
இளங்கோவின் ஆத்மாவாய்
இதயம் உரத்துப்பாடும்

காலையிலே தினமும்
குளித்த கையொடு
கிணற்றடியில் அம்மா நிகழ்த்திய
சூரிய வழிபாடும்

தைப்பொங்கல் படையல் வேளை
’சிவசூரியாய நம …
சிவசூரியாய நம … ’
இது அப்பு பாடும் பாடல் என்று
அம்மா பாட , நாங்கள் சேர்ந்து பாடிய
ஆராதனையும்
இன்று நெஞ்சிலே
விஸ்வரூபதரிசனமாகும்

இயற்கையோடு இசைந்த
பண்பாட்டு வாழ்வின் மேன்மை
’டிட்வா ’அனர்த்த இருண்மை தந்த
ஞானத்தால் உணரப்படும்

ஞாயிறு போற்றுதும்…
ஞாயிறு போற்றுதும்…

– என்.சண்முகலிங்கன்