மும்பையை அடுத்த தானே மாவட்டம் பிவண்டி வால்பாடா பகுதியில் உள்ள 3 மாடி குடோன் கட்டிடம் நேற்று முன்தினம் இடிந்து விழுந்தது.
இடிந்து விழுந்த கட்டிடத்தில் 20-க்கும் மேற்பட்டவர்கள் சிக்கியிருக்கலாம் என கூறப்பட்டது.
இதனையடுத்து, நவீன உபகரணங்கள் உதவியுடன் மீட்பு பணி முன்னெடுக்கப்பட்டது. நேற்று இரவு வரை மீட்பு படையினர் குழந்தைகள் உள்பட சுமார் 10 பேரை உயிருடன் மீட்டனர்.
மேலும் பெண் உள்பட 2 பேரின் சடலங்கள் மீட்கப்பட்டன. அத்துடன், கட்டிடம் இடிந்து சுமார் 20 மணி நேரத்துக்கு பிறகு நேற்று காலை 8 மணியளவில் மீட்பு படையினர் இடிபாடுகளில் இருந்து சுனில் பிசல்(வயது42) என்ற தொழிலாளியை உயிருடன் மீட்டனர்.
இதேபோல நேற்று முன்தினம் இரவு முதல் நேற்று இரவு வரை மேலும் 6 பேர் இடிபாடுகளில் இருந்து சடலமாக மீட்கப்பட்டனர். இதனால் கட்டிடம் இடிந்து விழுந்த விபத்தில் பலியானவர்கள் எண்ணிக்கை 8 ஆக அதிகரித்து உள்ளது.
தற்போது மீட்பு பணிகள் நிறைவடைந்துள்ளதாக தெரிவிக்கப்பட்டுள்ளது.
இடிந்து விழுந்த கட்டிடம் 10 ஆண்டுகளுக்கு முன் கட்டப்பட்டதாகும். இந்த சம்பவம் குறித்து கட்டிட உரிமையாளர் கைது செய்யப்பட்டுள்ளார்.
