‘குக் வித் கோமாளி’ நிகழ்ச்சி மூலம் ரசிகர்களிடையே பிரபலமான சின்னத்திரை நடிகர் புகழ், ‘மிஸ்டர் ஜூ கீப்பர்’ என்ற படத்தின் மூலம் வண்ணத்திரையில் கதையின் நாயகனாக அறிமுகமாகிறார்.
‘வேலை’, ‘என்னவளே’, ‘ஜூனியர் சீனியர் ‘ ஆகிய படங்களை இயக்கிய இயக்குநர் ஜெ. சுரேஷ் இயக்கத்தில் தயாராகி வரும் புதிய திரைப்படம் ‘மிஸ்டர் ஜூ கீப்பர்’.
இதில் தமிழ் திரை உலகில் குணச்சித்திர நடிகராகவும், நகைச்சுவை நடிகராகவும் அறிமுகமாகி பிரபலமான நடிகர் புகழ் கதையின் நாயகனாக நடிக்கிறார்.
இவருக்கு ஜோடியாக நடிகை ஷிரின் காஞ்ச்வாலா நடிக்கிறார்.
தன்வீர் மிர் ஒளிப்பதிவு செய்யும் இந்தப் படத்திற்கு யுவன் ஷங்கர் ராஜா இசை அமைக்கிறார்.
ஜே4 ஸ்டுடியோஸ் என்ற பட நிறுவனம் சார்பில் தயாரிப்பாளர் ஜெபா இப்படத்தை தயாரிக்கிறார்.
இப்படத்தின் படப்பிடிப்பு சென்னையில் தொடங்கி தொடர்ந்து நடைபெற்று வருகிறது.
‘சபாபதி’, ‘எதற்கும் துணிந்தவன்’, ‘வலிமை’ ஆகிய படத்தில் நகைச்சுவை வேடத்தில் நடித்த நடிகர் புகழ், ‘மிஸ்டர் ஜூ கீப்பர்” படத்தின் மூலம் கதாநாயகனாக உயர்ந்திருப்பதால் அவருடைய ரசிகர்கள் உற்சாகமடைந்திருக்கிறார்கள்.
வைகைப்புயல் வடிவேலு, சந்தானம், யோகி பாபு, சூரி ஆகியோரைத் தொடர்ந்து கதையின் நாயகனாக உயர்ந்திருக்கும் நகைச்சுவை நடிகர் புகழும் தமிழ் திரை உலகில் சிறந்த இடத்தை பெற வேண்டும் என திரையுலகினர் வாழ்த்துகிறார்கள்.