‘குட்டி ஸ்டோரி’ , ‘விக்டீம்’ ஆகிய டிஜிட்டல் தள படைப்புகளைத் தொடர்ந்து, நடிகை அமலா பால் கதையின் நாயகியாக நடித்து, தயாரித்திருக்கும் ‘கடாவர்’ எனும் படைப்பும் ஓகஸ்ட் 12 ஆம் திகதி முதல் டிஸ்னி ப்ளஸ் ஹாட் ஸ்டார் எனும் டிஜிட்டல் தளத்தில் வெளியாகிறது.
அமலா பால் புரொடக்ஷன்ஸ் பட நிறுவனம் சார்பில் நடிகை அமலா பால் கதையின் நாயகியாக நடித்து, முதன் முதலாக தயாரித்திருக்கும் திரைப்படம் ‘கடாவர்’.
அறிமுக இயக்குநர் அனூப். எஸ். பணிக்கர் இயக்கத்தில் தயாராகி இருக்கும் இந்த திரைப்படத்தில் அமலா பாலுடன் நடிகர்கள் ஹரிஷ் உத்தமன், திரிகுன், வினோத் சாகர், அதுல்யா ரவி, ரித்விகா உள்ளிட்ட பலர் நடித்திருக்கிறார்கள்.
அபிலாஷ் பிள்ளை எழுதிய கதைக்கு அரவிந்த் சிங் ஒளிப்பதிவு செய்ய, ரஞ்சின் ராஜ் இசையமைத்திருக்கிறார்.
படத்தைப் பற்றி நடிகை அமலா பால் பேசுகையில், “ அபிலாஷ் பிள்ளை பிள்ளையும், இயக்குநர் அனூப் எஸ். பணிக்கரும் எம்மை சந்தித்து ‘கடாவர்’ படத்தின் கதையை கூறியதும், எம்முடைய கதாபாத்திரம் புதுமையானதாகவும், வலிமையானதாகவும் இருந்ததால் நடிக்க ஒப்புக்கொண்டேன்.
பிறகு அவர்கள் தயாரிப்பாளர்கள் இல்லாமல் கஷ்டப்பட்டதை கண்டு, தயாரிப்பாளராகவும் பணியாற்ற சம்மதம் தெரிவித்தேன்.
நான்காண்டு காலம் கடினமாக உழைத்து பல போராட்டங்களுக்கு இடையே இந்த திரைப்படத்தின் பணிகளை நிறைவு செய்தோம்.
தற்போது இந்தியாவின் முன்னணி டிஜிட்டல் தளமான டிஸ்னி பிளஸ் ஹாட்ஸ்டாரில் ‘கடாவர்’ தமிழ் உள்ளிட்ட ஐந்து மொழிகளில் ஓகஸ்ட் 12 ஆம் திகதி முதல் வெளியாகிறது.
பல மெடிக்கல் கிரைம் திரைப்படங்கள் வெளியானாலும், தடயவியல் துறையில் இதுவரை படைப்புகள் அதிகமாக வெளியானதில்லை. காவல்துறையில் பணியாற்றும் தடயவியல் நிபுணர் வேடத்தில் நான் நடித்திருக்கிறேன். ஒளிப்பதிவு, படத்தொகுப்பு, பின்னணி இசை என அனைத்து விடயங்களும் நேர்த்தியாக இருக்கும்.” என்றார்.
இதனிடையே காவல்துறையில் பணியாற்றும் தடயவியல் நிபுணர் பத்ராவாக நடித்திருக்கும் நடிகை அமலாபால், இந்த கதாபாத்திரத்திற்காக சென்னை மற்றும் தமிழகத்தில் உள்ள பல மருத்துவமனைகளில் இடம்பெற்றிருக்கும் பிணவறைகளுக்கு நேரடியாக சென்று பார்வையிட்டு, தன் கதாபாத்திரத் தோற்றத்தை திரையில் நேர்த்தியாக வெளிப்படுத்தியிருக்கிறார் என்பதும், அவரின் அர்ப்பணிப்புடன் கூடிய இந்த முயற்சிக்கு படக்குழுவினர் வாழ்த்து தெரிவித்திருக்கிறார்கள் என்பதும் குறிப்பிடத்தக்கது.
